काठमाडौं । युक्रेनसँगको युद्धबाट सोचेजस्तो सफलता हात नपरे पछी रुसी राष्ट्रपति भ्लादिमिर पुटिनले रक्षामन्त्री परिवर्तन गर्न लागेका छन् । राष्ट्रपति पुटिनले रक्षामन्त्री सर्गेई शोइगुलाई दिईएको जिम्मेवारी परिवर्तन गर्न लागेका छन् । ६८ वर्षीय शोइगुले निक्कै लामो समय सन् २०१२ देखि नै रुसको रक्षा मन्त्रालयको जिम्मेवारी सम्हाल्दै आएका थिए ।

अब उनलाई रुसको सुरक्षा परिषद्को प्रमुखमा नियुक्त दिईनेछ । राष्ट्रपति भवनबाट जारी विज्ञप्तिमा सोइगुको स्थानमा उपप्रधानमन्त्री आन्द्रेई बेलोसोभले रक्षा मन्त्रालयको जिम्मेवारी सम्हाल्ने बताइएको छ ।

युक्रेनसँग चलिरहेको युद्धमा शोइगुको महत्वपूर्ण भूमिका रहेको छ । रुसी सरकारी दस्तावेजबाट राष्ट्रपति पुटिनले सोइगुलाई सुरक्षा परिषद्को प्रमुखको महत्वपूर्ण जिम्मेवारी दिन चाहेको खुलासा भएको छ ।

शोइगुलाई पुटिनको नजिक मानिन्छ र कुनै सैन्य अनुभव बिना रक्षा मन्त्रालयको जिम्मेवारी दिइएको थियो। सोइगु पेशाले सिभिल इन्जिनियर हुन् । १९९० मा शोइगु आपतकालीन र विपद् राहत मन्त्रालयको प्रमुख निर्वाचित भए।

राष्ट्रपति पुटिनले भर्खरै रुसमा भएको आम निर्वाचनमा ८७ प्रतिशत मत प्राप्त गरी पाँचौं पटक पद तथा गोपनीयताको शपथ लिएका छन् ।