काठमाडौं । प्रसिद्ध तीर्थस्थल पाथीभरामा वैशाख महिनामा मात्रै ५१ हजार चार सय भक्तजन आएका छन् । ताप्लेजुङस्थित पाथीभरा मन्दिरमा दर्शन गर्ने दर्शनार्थीको चाप बढ्दै गएको पाथीभरा क्षेत्र विकास समितिका कार्यकारी निर्देशक प्रजिन हाङवाङले बताए । साउनदेखि चैत मसान्तसम्ममा एक लाख ६८ हजार चार सय ६८ जनाले मन्दिरको दर्शन गरेको निर्देशक हाङवाङले जानकारी दिए ।

हाङवाङका अनुसार सबैभन्दा बढी चैत महिनामा ५२ हजार चार सय ५५ जनाले दर्शन र कात्तिकमा ४९ हजार एक सय ६३ जनाले दर्शन गरेका थिए । साउन महिनामा एक हजार एक सय २२, भदौमा पाँच हजार र असोजमा १० हजार तीन सय ४३ भक्तजनले दर्शन गरेको हाङवाङले बताए ।

मंसिरमा २० हजार चार सय १६, पुसमा पाँच हजार ६ सय ५५, माघमा ६ हजार चार सय एक र फागुनमा १७ हजार नौ सय १२ जनाले पाथीभरा मन्दिरको दर्शन गरेको बताइएको छ । पाथीभरा मन्दिर हिन्दु एवं बौद्धहरूको महत्त्वपूर्ण धार्मिक स्थल हो । यहाँ वर्षभरि भक्तजनहरूको घुइँचो लाग्ने गर्दछ ।