काठमाडौं । नाडा अटोमोबाइल्स एसोसिएसन अफ नेपालले आर्थिक वर्ष २०८०/०८१ को मौद्रिक नीतिको तेस्रो त्रैमासिक समीक्षाको स्वागत गरेको छ । उक्त त्रैमासिक समीक्षामा बैंक तथा वित्तीय संस्थाले प्रवाह गर्ने विद्यमान एक सय २५ प्रतिशत जोखिम भार रहेका हायर पर्चेज प्रकृतिका सवारीसाधन कर्जाको जोखिम भार घटाई शतप्रतिशत कायम गरेको छ ।
त्यसैगरी बैंक तथा वित्तीय संस्थाको एक वर्ष अवधि व्यतित भइसकेका लगानीमध्येबाट एक आर्थिक वर्षमा आफ्नो प्राथमिक पुँजीको २० प्रतिशतसम्म बिक्री गर्न पाउने व्यवस्थाका साथै बैंक तथा वित्तीय संस्थाबाट प्रवाहित असल वर्गमा वर्गीकरण कर्जाका लागि गर्नुपर्ने विद्यमान कर्जा नोक्सानी व्यवस्था १.२५ प्रतिशतबाट घटाई १.२० प्रतिशत कायम गरिएको छ । उल्लेखित व्यवस्था एकदमै सकारात्मक रहेको नाडाद्वारा शुक्रबार जारी प्रेस विज्ञप्तिमा उल्लेख छ ।
तथापि नाडाले नेपालको अटोमोबाइल क्षेत्रको उत्थानका लागि आवश्यक पर्ने पेट्रोल र डिजेलबाट चल्ने सवारीसाधनलाई बंैकबाट हायर पर्चेज लोन प्रवाह प्रकियामा लोन टु भ्यालु रेसियोमा हाल ५० प्रतिशतको सीमा तोकिएकोमा अटोमोबाइल व्यवसाय गम्भीररूपले प्रभावित बनेको जनाएको छ । त्यस्तै लोन टु भ्यालु रेसियो ५० प्रतिशत बढाएर ७५ प्रतिशत पुर्याउनुपर्ने, पेट्रोल र डिजेलबाट चल्ने निजी प्रयोजन र व्यावसायिक महत्वका सवारीसाधन स्पष्टरूपमा छुट्याई सोहीअनुरूप बैंक लगानी गर्न सहजीकरण गरिदिनुपर्ने पनि नाडाको माग रहेको छ ।
त्यस्तै घरपरिवारको आम्दानी सामान्यतया घरका धेरै सदस्यले प्रयोग गर्ने अर्थात् दम्पतीले सवारीसाधनका रूपमा अटोलोन उधारकर्ताको चुक्ता गर्ने क्षमताको गणना गर्दा विचार गर्नुपर्ने, सवारीसाधनका लागि आफैँ प्रतीतपत्र खोल्दा नेपाल राष्ट्र बैंकको १० प्रतिशत धरौटी रकम लिएरमात्र प्रतीतपत्र जारी गर्ने व्यवस्थाको जिम्मेवारी सम्बन्धित बैंकलाई नै प्रदान गरिनुपर्ने भनी नाडाले दिएका सुझाव सम्बोधन नभएको नाडाको गुनासो छ । राष्ट्र बैंकले ल्याएका उल्लेखित आंशिक सुधार निश्चय नै सकारात्मक रहेको उल्लेख गर्दै नाडाले दिएको बाँकी सुझाव पनि आउँदा दिनमा सम्बोधन हुँदै जानेमा नाडाले अपेक्षा गरेको छ ।
