बारा । जीतपुर सिमरा उपमहानगरले सिमरा बजार क्षेत्रको सार्वजनिक जग्गामा बनेका अवैध संरचना हटाउने भन्दै उपमहानगरले सार्वजनिक सूचना निकालेर शनिवार बिहान जीतपुर सिमरा अस्पताल क्षेत्रसँगै रहेको सार्वजनिक जग्गामा बनेका अवैध संरचना खाली गर्ने जनाएको हो ।

एक वर्षअघि नै नगरप्रमुख राजन पौडेल नेतृत्वको कार्यपालिकाले सो सार्वजनिक जग्गामा बनेका अवैध संरचना हटाउन खोज्दा शेख जहिरले उच्च अदालत जनकपुर अस्थायी इजलास वीरगन्जमा उपमहानगर विरुद्ध रिट निवेदन दायर गरेका थिए । तर वैशाख ३० गते न्यायाधीशद्धय हरिशचन्द्र ढुङ्गाना र खडानन्द तिवारीको संयुक्त इजलासले अन्तरिम आदेश जारी गर्न नपर्ने भन्दै सो रिट निवेदन खारेज गरेपछि उपमहानगरलाई सो सार्वजनिक जग्गा संरक्षण गर्न बाटो खुलेको हो ।

उपमहानगरले साबिक प्रिपा सिमरा गाविसको नाममा स्रेस्ता कायम रहेको कित्ता नं ८१६ को १ बिगाहा १ कट्ठा, कित्ता नं ८३१ को ३ कट्ठा ४ धुर र कित्ता नं. ८३२ को १५ कट्ठा, ३ धुर सार्वजनिक जग्गाभित्र अनधिकृत रूपमा बनेका घर टहराहरू शनिवार बिहान खाली गर्न लागेको हो ।

उपमहानगरले पछिल्लो समय वडा नं ७ को गौशाला र वडा नं १२ फत्तेपुर सार्वजनिक जग्गामा बनेका अवैध संरचनाहरू खाली गरेको थियो ।