काठमाडौं । डोलेश्वरको प्रसिद्धि तथा जगाती–डोलेश्वर–आशापुरी सडक विस्तार र कालोपत्र भएसँगै भक्तपुरको दक्षिण पूर्वमा रहेको आशापुरी महादेव मन्दिरमा भक्तजनको ओइरो लाग्न थालेको छ ।

काठमाडौँबाट आशापुरी महादेव मन्दिर पुग्नको लागि दुइवटा बाटाहरु छन । एउटा बाटो साँगा भन्ज्यांगबाट दक्षिण लाग्छ भने अर्को बाटो डोलेश्वोर महादेवको मन्दिर बाट पाटी भन्ज्यांग हुदै पूर्व लाग्छ । जुनबाटो लागेपनि बाटोमा देखिने दृश्यहरुले काठमाडौँको कोलाहललाई बिर्साई दिन्छ । जति पनि काठमाडौँबाट आशापुरी महादेव मन्दिर पुग्न खोज्ने भक्तजनको गुनासो, सडक राम्रो नबनेको रहेको मन्दिरका पुजारी बताउनुहुन्छ ।

आशापुरी महादेव मन्दिर भक्तपुर र काभ्रे जिल्लाको सिमानाभै बग्ने कभेरी खोला र नर्मदा खोलाको दोभानमा अवस्थित छ । स्थानीयहरु नैचाल खोला र काक्रेवारी (भक्तपुर खोला र आशापुरी खोला) खोला पनि भन्छन । जुनसुकै नामले चिनिए पनि दुई साना खोलाको दोभानमा निक्कै सुन्दर र आकर्षक पहाडका थुम्काहरु विच अतिनै मनोरम स्थलमा अवस्थित छ
आशापुरी महादेव । चारैतिर पहाडले घेरिएको यो स्थल प्राकृतिक दृष्टिले अति रमणीय छ । मन्दिरको अग्रभाग दक्षिणतर्फ फर्किएको छ ।

मन्दिर परिसरमा देखिने निकै प्राचिन ढुंगाका मुर्तिहरु बाट पनि सजिलै के अन्दाज लगाउन सकिन्छ भने, यस पुण्यभूमिमा परापुर्वकालदेखीनै योग ध्यान र साधना गरिदै आएको थियो । यहाँ रहेको आशापुरेश्वोर महादेवको दर्शन गर्नाले भक्तजनहरुको आशा पुरा हुने विस्वास छ । मन्दीर परिसर भित्र पाटी, भजन मण्डली, पांच कुमारी धारा, बुद्ध स्तुपाहरु र अस्थाई प्रहरी चौकी रहेको छ ।

श्री आशापुरेश्वर महादेव भन्दा थोरै उत्तर तर्फ रुद्रेश्वर भगवानको शिव मन्दिर रहेको छ । राती विशाल पानी परेको र तै पानीले वगाएर शिवलिङ्ग त्यहाबाट हराएको किंवदन्ती रहेको छ । पछि उक्त शिवलिङ्ग आशापुरेश्वरमा भेटिएको भनाई छ । यस सम्वन्धमा पनि निक्कै चाखलाग्दो प्रसंग रहेको छ । हालको जिल्ला सिमाना भक्तपुर र काभ्रे जिल्लामाको सिमानामा पवित्र नदी छ । सो नदिको पुर्व तर्फ घर हुने काभ्रेका किसानले आफ्नो गोठ रहेको स्थान भक्तपुरबाट दुध लिएर खोला तर्दा दुध हराउने र यसैगरी भक्तपुर घर हुने किसानले आफ्नो गोठकाभ्रेबाट दुध लिएर खोला तर्दा दुध हराउन थाले पछि आजित भएर यसको रहस्य खोज्न थाल्दा, हालको आशापुरेश्वर मन्दिर रहेको स्थानमा अदभुत शिवलिङ्ग फेला परेको र पछि खोज्दै जादा उक्त शिवलिङ्ग ईन्द्रेश्वर वाट बाढीलो वगाएको खुल्न गएको र पछी स्थानीयहरुले अव फिर्ता नलैजाने र यसै स्थानमा स्थापना हुन गएको हालको चर्चित मन्दिर आशापुरेश्वर रहेको किवदन्ती रहेको छ ।