काठमाडौँ । देशकै ठुलो तथा पवित्र धाम पाशवत क्षेत्र पशुपतीनाथ परिसरमा विशाल कोटीहोम महायज्ञ विधिवत् रुपमा हिजो साउन १ गतेबाट शुरु भएको छ ।
यही साउनभर सञ्चालन हुने कोटीहोम महायज्ञको हिजो एक कार्यक्रमबीच उद्घाटन गरिएको छ। साथै श्री शिवमहापुराण र श्रीमद्भागवतको कथा प्रवचन पनि शुरु भएको छ।
कोटीहोम महायज्ञको पहिलो दिन ठूलो सङ्ख्यामा भक्तजन आएका थिए। पहिलो दिन ५ हजारभन्दा बढी भक्तजनको सहभागिता रहेको कोटीहोम आयोजक समितिले जनाएको छ।
मानवसेवा फाउण्डेशनका संस्थापक तथा पशुपतिनाथ कोटीहोम महायज्ञका सङ्कल्पकर्ता विजय कृष्णमूर्ति महाराजको अध्यक्षतामा शुरु कोटीहोम महायज्ञ उद्घाटनमा पशुपतिनाथ मन्दिरका मूलभट्ट राहुल गणेश भट्टको प्रमुख आतिथ्यता थियो।
सांसद शेरबहादुर कुँवर, ज्ञानबहादुर शाही, पशुपति विकास कोषका सदस्य सचिव डा मिलनकुमार थापा, किरात धर्मगुरु डा चन्द्रकुमार शेर्मालगायत लामा गुरु, बौद्ध गुरुलगायतको सहभागिता रहेको थियो।
उद्घाटनको दिनबाट सुप्रसिद्ध कथावाचिका राधिका दासीले शिवमहापुराण र देवी प्रतिभाले श्रीमद्भागवतको कथा शुभारम्भ गरेका छन्।
दैनिक विहान ८ बजेदेखि २ बजेसम्म कथावाचिका दासी र दिउँसो २ बजेदेखि ७ बजेसम्म देवी प्रतिभाले कथा प्रवचन गर्ने आयोजकले जनाएको छ।
यसका साथै रुद्री पाठ, १८ पुराण पाठ, १०८ श्रीमद्भागवत पाठ र सप्तचण्डी पाठ पनि शुरु भएको छ।
