काठमाडौं । नेपाली विज्ञापन एजेन्सीहरूले आफ्ना सिर्जनात्मक कामबाट विश्वव्यापी मञ्चमा उल्लेखनीय छाप छोडिरहेका छन् । सोही क्रममा रुरल मार्केटिङ एसोसिएसन अफ इण्डियाद्वारा हालै भारतमा आयोजित ‘फ्लेम अवार्ड२०२४’ समारोहमा नेपालको अग्रणी विज्ञापन एजेन्सी ‘भि–चित्र’ले दुई स्वर्ण र एक रजत पुरस्कार प्राप्त गरेको छ । भि-चित्रले नेपाली तयारी चाउचाउ ब्राण्ड वाइवाइका लागि सञ्चालन गरेको ‘हामी सबैको मनमा वाइवाइ’ उत्कृष्ट लामो अवधिको अभियान र कपालको हेरचाहसम्बन्धी ब्राण्ड ‘लिभोन’का लागि गरिएको क्याम्पेन ‘किप योर कलर्स’ वर्षको उत्कृष्ट बजेट क्याम्पेन घोषित हुँदै गोल्ड अवार्ड प्राप्त गरेको हो । साथै भि-चित्रले लिभोन प्रोफेसनलका लागि गरेको अभियान वर्षकै बेस्ट इनोभेटिभ क्याम्पेन घोषित हुँदै सिल्भर अवार्डद्वारा सम्मानित भएको छ ।
भि–चित्र डिजिटल मिडिया र कन्टेन्टस्ट्राटेजी प्रमुख रसना डंगोलले भन्नुभयो, ‘नेपाली उपभोक्ताको दृष्टिकोण टेक्नोलोजीको वृद्धि र परिवर्तनशील मार्केटिङ परिदृश्य साथ विकसित भइरहेको छ । प्रगतिशील समाज र उपभोक्तासँग अनुकूलन हुने गरी लिभोनले समाजको हितमा चालेका कदममा ब्राण्डको छवि प्रतिबिम्बित भएको छ । सौन्दर्य र व्यक्तिगत हेरचाह क्षेत्रमा सबैभन्दा कम प्रतिनिधित्व गर्ने क्षेत्रमा लिभोनले लिएको पहल सराहनीय छ र यसले लिभोनलाई एक आधुनिक ब्राण्डका रूपमा स्थापित गरेको छ । यसै सन्दर्भमा लिभोनले दीप्ति र सुप्रिताको कथा प्रस्तुत गरेको थियो, जो नेपालमा आधिकारिक रूपमा विवाह गर्ने पहिलो समलैंगिक जोडी हुन् । उनीहरूलाई उनीहरूको मौलिक रंग अक्षुण्ण राख्न प्रोत्साहित गर्दै लिभोनले समाज परिवर्तनको यात्रामा एक साहसिक कदम चालेको छ । यसबीचमा लिभोन प्रोफेसनलसिरम अभियानले आफ्नो कामका लागि परिचित सौन्दर्य स्टाइलिस्टसमेत ल्याएको छ, जसले ब्राण्डप्रतिको विश्वास अझ गाढा बनाउन र आफ्ना शुभचिन्तकलाई उनीहरूसँग सिधै सम्पर्क स्थापित गर्न सहयोग गरेको छ ।’ भि-चित्रका ग्राहक सम्बद्ध प्रमुख अनुपम श्रेष्ठले भन्नुभयो, ‘विज्ञापनले पुस्ताहरू जोड्छ । हामी सबैको मनमा वाइवाई, यसैको एउटा प्रमुख उदाहरण हो ।’ सन् २००० मा सुरु भएको वाइवाइ नेपालकै लोकप्रिय ब्राण्ड हो तर पनि पुस्तान्तरणसँगै ग्राहकसँग सम्बन्ध बनाइराख्नु उत्तिकै जरुरी हुन्छ । सन् २००० को प्रारम्भमा सुरु गरिएको मौलिक अभियान ‘हामी सबैको वाइवाइ’ ले गहिरो रूपमा सबैको मनमा प्रतिध्वनित गरेको हुनाले आज पनि हामी पुराना र नयाँ दुवै दर्शक जोड्ने कुरा सिर्जना गर्न, दुवैसँग भावनात्मक सम्बन्ध र संलग्नता कायम गर्न स्थापित परिचयको लाभ लिँदै पुराना भावनामा आधुनिक टच मिसाउँछौँ ।’(हिमालय टाईम्स)
