काठमाडौं । कर्णालीबाट एक वर्षमा चार अर्बको कृषिजन्य वस्तु निर्यात भएको छ। गएको आर्थिक वर्षमा प्रदेशभित्र उत्पादन भएको कृषि र पशुजन्य उपजहरू गरी ४ अर्ब ११ करोड ७७ लाख ८१ हजार रुपैयाँबराबरको निर्यात भएको हो। भूमि व्यवस्था, कृषि तथा सहकारी मन्त्रालयका अनुसार यो अवधिमा २ अर्ब २६ करोड ६७ लाख ११ हजारबराबरको तरकारी, फलफूल, मह र मसलाबाली निर्यात भएको छ।

यस्तै, सोही अवधिमा १ अर्ब ८४ करोड ९० लाख ७० हजार मूल्यबराबरको खसी, दूध, माछा, राडीपाखी र छुर्पीलगायतका पशुजन्य उपज निर्यात भएको मन्त्रालयको भनाइ छ। भूमि व्यवस्था, कृषि तथा सहकारी मन्त्रालयका अनुसार विस्तारै प्रदेशले कृषिजन्य उपजहरू निर्यात गर्न थालेको बताएको छ । साथै मन्त्रालयले कृषिबाटै प्रदेशलाई आत्मनिर्भर बनाइने भन्दै यसका लागि सरकारले कृषि र किसानमा लगानी बढाउने बताएको छ । कृषि उत्पादनमा वृद्धि भए मात्र प्रदेशलाई आत्मनिर्भर बनाउन सकिने बिश्वास मन्त्रालयको छ ।

यसैबिच प्रदेश सरकारले भेडा र चौंरीको संरक्षण गर्न हिमाली जिल्लाका किसानलाई व्यावसायिक पालनमा प्रोत्साहन गर्न थालेको छ। यसका लागि व्यावसायिक रूपमा पशु पालक किसानले आर्थिक सहयोग पाउन थालेका छन ।