रोहित, दीपेन्द्र र सन्दीप अभ्यासका लागी भारत नजाने

काठमाडौं । भारतमा हुने नेपाली राष्ट्रिय क्रिकेट टोलीको अभ्यासमा कप्तानसहित खेलाडी सहभागी नहुने भएका छन् । हाल क्यानडामा रहनुभएका कप्तान रोहितकुमार पौडेल, अलराउन्डर दीपेन्द्रसिंह ऐरी र लेग स्पिनर सन्दीप लामिछाने भारतमा हुने प्रशिक्षणमा सहभागी नहुने नेपाल क्रिकेट संघ(क्यान)का प्रवक्ता छुम्बी लामाले बताउनुभयो ।

तीनै खेलाडी ग्लोबल टी ट्वान्टी लिगका लागि क्यानडा जानुभएको थियो । ‘हामी अन्तिममा जाने भनेको क्यानडा नै हो । उनीहरू उतै रहनेछन् । दीपेन्द्र र रोहित अर्को लिगका लागि वेस्ट इण्डिज जान्छन् । सन्दीप भने क्यानडामा रहन्छन्,’ प्रवक्ता लामाले भन्नुभयो, ‘नेपालमा वर्षाको सिजन भएकाले नेपाली टोली खेलभन्दा केही अघि नै क्यानडा जाने तयारीमा रहेको छ ।’

नेपालले सेप्टेम्बरमा क्यानडामा ओमान र घरेलु टोलीबीच त्रिकोणात्मक सिरिज खेल्नेछ । नेपालको लिग-२ मा यो दोस्रो सिरिज हो । नेपालले लिग–२ अन्तर्गत दोस्रो राउण्डको त्रिकोणात्मक सिरिज खेल्न लागेको हो ।

क्यानडामा आयोजना हुने विश्वकप लिग-२ अन्तर्गतको त्रिकोणात्मक सिरिजको तयारीका लागि नेपाली टोली सोमबार भारत गएको छ । टोलीले बैंगलोरको राष्ट्रिय क्रिकेट एकेडेमी (एनसिए) मा दुई साता प्रशिक्षण गर्ने प्रवक्ता लामाले बताउनुभयो । ‘भारतमा हुने अभ्यासमा रोहित, सन्दीप र दीपेन्द्रबाहेकका १९ खेलाडी सहभागी हुनेछन् । गुलसन झा र देव खनाल भारतमा नै रहेकाले उतैबाट टोलीमा सामेल हुने क्यानले जनाएको छ । मुख्य प्रशिक्षक मोन्टी देसाई पनि भारतमा नै टोलीमा सामेल हुनुहुनेछ ।
(हिमालय टाइम्स)