काठमाडौं । छैटौँ राष्ट्रिय एमेच्योर बुद्धिचाल प्रतियोगिता भदौ ७ देखि १० गतेसम्म झापामा हुने भएको छ । नाइट चेस क्लबको आयोजनामा हुन लागेको प्रतियोगितालाई नेपाल बुद्धिचाल महासंघले प्राविधिक सहयोग गर्नेछ । क्लबका अध्यक्ष तथा प्रतियोगिताका संयोजक विश्वविजय घिमिरेले दिएको जानकारीअनुसार प्रतियोगितामा १५० जना खेलाडीले सहभागिता जनाउने पक्का भएको छ ।
प्रतियोगिताका विजेता तथा उपविजेताले मंसिर १३ देखि पुस २२ सम्म युएईको अलएन शहरमा हुने अन्तर्राष्ट्रिय प्रतियोगितामा स्थान सुरक्षित गर्नेछन् । मेची नगरपालिका र पशुपति बोर्डिङ स्कुल प्रमुख प्रायोजन रहने क्लासिकल बुद्धिचाल प्रतियोगिता रेटिङ एक हजार ७०० देखि दुई हजारसम्म र रेटिङ एक हजार ७०० मुनि गरी दुई क्याटेगोरी समावेश गरिएको छ । दुवै विधामा १०औँ स्थानसम्म रहने खेलाडीलाई पुरस्कारको व्यवस्था गरिएको छ ।
आयोजक नाइट चेस क्लबका प्रथम उपाध्यक्ष राजु पौडेलका अनुसार विजेताले ५० हजार, उपविजेताले २५ हजार र तेस्रो स्थान हासिल गर्नेले १५ हजार रुपैयाँ प्राप्त गर्नेछन् । यसैगरी चौथोदेखि सातौँ स्थानमा रहनेले क्रमशः १२, १० र ६ हजार तथा आठौँ, नवौँ र १०औँ स्थान हासिल गर्नेले जनही पाँच हजार पाउनेछन् । अन्तर्राष्ट्रिय आर्विटर बालाराम पुन प्रमुख निर्णायक रहने निर्णायक मण्डलमा फिडे आर्विटर कोर्स पूरा गरेका सोराज ताम्राकार र सिनियर राष्ट्रिय आर्विटर हरिकृष्ण श्रेष्ठ हुनुहुन्छ ।
प्रतियोगिता आयोजना गर्न १८ लाख २२ हजार खर्च हुने आयोजकको अनुमान छ । प्रतियोगिताको उद्घाटन मेचीनगर नगरपालिका मेयर गोपालचन्द्र बुढाथोकीले तथा समापन कोशी प्रदेश सभा सदस्य गोपाल तामाङले गर्ने क्लबले जनाएको छ ।
