काठमाडौं । गैरआवासीय नेपाली नागरिकताको पूर्ण कार्यान्वयनका सम्बन्धमा विशेष अन्तरक्रिया कार्यक्रम सम्पन्न भएको छ । अध्यक्ष डा. बद्री केसीको नेतृत्वमा आयोजित कार्यक्रममा गृहमन्त्री रमेश लेखक, संविधानसभा सदस्य वरिष्ठ अधिवक्ता राधेश्याम अधिकारी, डा. खिमलाल देवकोटा, राष्ट्रियसभाका पूर्वसदस्य रामनारायण बिडारी र पूर्वमहान्यायाधिवक्ता अग्निप्रसाद खरेलको सहभागिता रहेको थियो ।

सो अवसरमा गैरआवासीय नेपाली संघ(एनआरएनए) पदाधिकारीहरूले सरकारले आर्थिक, सामाजिक र सांस्कृतिक अधिकारसहित नागरिकता व्यवस्था गरे पनि अझै उक्त अधिकार प्राप्त हुन नसकेको भन्दै ध्यानाकर्षण गराएको थियो । गैरआवासीय नेपाली नागरिकता लिने क्रममा सम्बन्धित निकायहरूमा अझ केही अस्पष्टता देखिएकाले नागरिकता लिन समस्या भएको एनआरएनएले जनाएको छ ।

नागरिकता प्राप्त गरिसकेपछि पनि सामाजिक, सांस्कृतिक र आर्थिक अधिकार पूर्ण प्रयोग गर्न नपाएको एनआरएनको भनाइ छ । एनआरएनए अध्यक्ष डा. केसीले ठूलो संघर्षपछि सरकारले नागरिकता प्राप्तिको बाटो खुला गरे पनि सम्बन्धित निकायमा समयमै परिपत्र नहुँदा समस्या भोग्नुपरेको बताउनुभयो । गृहमन्त्री लेखकले सरकारले गैरआवासीय नेपाली नागरिकता कार्यान्वयनमा देखापरेका समस्या समाधान गर्दै सम्बन्धित निकायमा छिट्टै आवश्यक परिपत्र गर्ने प्रतिबद्धता जनाउनुभएको छ ।

कार्यक्रमका अन्य वक्ताले समेत गैरआवासीय नेपाली नागरिकता पूर्ण कार्यान्वयनमा देखापरेका कानुनी अड्चन हटाउन सक्दो पहल गर्ने बताएका थिए । कार्यक्रममा नेपालको विद्यमान कानुनमा रहेका समस्या, कानुन तथा नियमावली संशोधनका उपाय तथा अध्यागमन, मालपोत, बैंक तथा अन्य व्यावहारिक ठाउँका समस्या तुरुन्त समाधानका लागि बृहत् छलफल भएको थियो ।

कार्यक्रममा अध्यक्ष डा. सीसहित उपमहासचिव सोम सापकोटा, सहकोषाध्यक्ष कृष्ण तिमिल्सेना, एसिया प्यासिफिक क्षेत्रीय संयोजक हरि भट्टराई, सल्लाहकार अतुल कोइराला, संस्थापक अन्तर्राष्ट्रिय संयोजक भीम उदास, पूर्वउपाध्यक्ष (एनसिसी बेल्जियम) तीर्थ धमला, प्रमुख कार्यकारी अधिकृत राजेन्द्रकुमार राउत, अधिकृत कुनाल मिश्र र एनआरएन नेपाली गरिकताका फोकल पर्सन सरोज दाहाललगायतको उपस्थिति रहेको एनआरएनएले जनाएको छ ।