काठमाडौं । साफ यू-२० च्याम्पियनसिपमा नेपाल समूह विजेता बन्दै सेमिफाइनलमा प्रवेश गरेको छ । ललितपुरको सातदोबाटोस्थित एन्फा कम्प्लेक्स मैदानमा बिहीबार भएको खेलमा नेपालले बंगलादेशलाई दुई-एक गोल अन्तरले पराजित गरेको हो ।

खेलको पहिलो हाफको १५औँ मिनेटमा नेपालले सुरुवाती अग्रता बनाएको थियो । निराजन धामीको गोलमा नेपालले अग्रता बनाएको थियो । लगत्तै १६औँ मिनेटमा समिर तामाङको गोलमा नेपालले अग्रता दोब्बर पारेको थियो । पहिलो हाफको इन्जुरी समयमा बंगलादेशले एक गोल फर्कायो । इस्लामको गोलमा बंगलादेशले खेलमा दुई-एकको अवस्थामा ल्यायो ।

हारका बाबजुद पनि बंगलादेश समूह उपविजेताका रूपमा अन्तिम चारमा पुगेको छ । समूह ‘ए’ बाट दुई खेलमा पराजित भएको श्रीलंका भने समूह चरणबाटै बाहिरिसकेको छ ।

नेपालले अब सेमिफाइनलमा समूह ‘बी’ को उपविजेता टोलीसँग खेल्नेछ । बंगलादेशले भने समूह ‘ए’ को विजेतासँग खेल्नेछ ।
समूह ‘बी’ मा रहेका भारत, भुटान र माल्दिभ्स तीनै टोलीको सेमिफाइनल पुग्ने सम्भावना उत्तिकै छ । समूह ‘बी’ को अन्तिम खेलमा आज (शुक्रबार) भारत र माल्दिभ्स खेल्नेछन् । यो खेलपछि सेमिफाइनल समीकरण पूरा हुनेछ ।

समूह ‘बी’ मा भारत र भुटानले समान एक खेल जितेका छन् । भारत र माल्दिभ्सले एक खेल खेल्न बाँकी छ । आजको खेलमा भारतले माल्दिभ्सलाई पराजित गरे भुटान सेमिफाइनलमा पुग्नेछ ।