काठमाडौं । प्रतिनिधि सभा सदस्य डा. शशांक कोइरालाले जनमत सङ्ग्रह गरी नेपाल हिन्दु राष्ट्र कायम गर्नुपर्ने बताउनुभएको छ ।
गैँडाकोट–१०, पितौजीमा आयोजित श्रीमद्भागवत सप्ताह ज्ञानमहायज्ञमा उहाँले आफुले हिन्दु राष्ट्र हुनुपर्ने अठोट लिएको बताउँदै जनमत सङ्ग्रह गरेर भएपनि नेपाललाई हिन्दु राष्ट्रमा परिणत गर्नुपर्ने बताउनुभयो । साथै आश्रमको स्तरोन्नतीका लागि उहाँले सरकार, दातृ निकाय र भातृ निकायमा समेत पहल गर्ने आश्वासन दिनुभयो । कार्यक्रममा पूर्व सांसद सत्यनारायण खनाल, काँग्रेस नेता गजेन्द्र आले, अमृत भट्टचन, एमाले नेता एवं गैँडाकोट १० का वडा अध्यक्ष देवीदत्त कँडेल लगायतले आश्रमको विकासका लागि पहल गर्ने बताउनुभयो ।
श्रीसिद्धिदात्री दुर्गामन्दिर कोटीहोम आश्रमको आयोजनामा जारी महायज्ञमा वाचन प्रवीण पण्डित दिनबन्धु पोखरेलले कथा वचान गरिरहनुभएको छ ।
आश्रमस्थलको वृहत गुरुयोजना अनुसार समावेसी गुरुकुल विद्यापीठ भवन, अतिथि सत्कार भवन, गुरुगोरखनाथ मन्दिर, गौशाला लगायतका विविध भौतिक संरचनाहरुको निर्माणका लागि गरिएको महायज्ञ फागुन १ गतेसम्म सञ्चालन हुने आयोजक समितिका संयोजक राजेन्द्रप्रसाद कण्डेल (राजु) ले जानकारी दिनुभयो ।
महासचिव नरहरि सापकोटाका अनुसार महायज्ञमा हालसम्म १ करोड २० लाख रुपैयाँ संकलन भएको छ ।
