काठमाडौं । सरकारले झण्डै नौ महिनापछि टिकटक माथिको प्रतिबन्ध पूर्ण रूपमा हटाएको छ । सञ्चार तथा सूचना प्रविधि मन्त्रालयले प्राधिकरणलाई प्रतिबन्ध फुकुवाको लागि शुक्रबार आधिकारिक पत्र पठाएको थियो । मन्त्रालयको पत्र आएसँगै दूरसञ्चार क्षेत्रको नियामक निकाय नेपाल दूरसञ्चार प्राधिकरणले पनि शुक्रबार नै एक सूचना जारी गर्दै सबै इन्टरनेट सेवा प्रदायक र मोबाइल सेवा प्रदायकलाई टिकटक माथिको प्रतिबन्ध हटाउन निर्देशन दिएको थियो । उक्त निर्देशनसँगै नेपालमा टिकटक चल्न थालेको हो ।

यसअघि भदौ ६ गते बसेको मन्त्रिपरिषद् बैठकले टिकटकमाथि लगाएको प्रतिबन्ध फुकुवा गर्ने निर्णय गरे पनि औपचारिक पत्र नहुँदा टिकटक चल्न सकेको थिएन । तर, शुक्रबारदेखि भने लामो समयदेखि प्रतिबन्धित टिकटक पुनः चल्न थालेको हो । प्राधिकरणले मन्त्रिपरिषद् बैठकले यही भदौ ६ गते प्रतिबन्ध हटाउने निर्णय गरेकाले अर्को निर्णय नहुँदासम्म भएको रोक नलगाउन सेवा प्रदायकहरूलाई भनेको छ । नेपाल दूरसञ्चार प्राधिकरणको सूचनामा भनिएको छ, ‘नेपाल सरकार, मन्त्रिपरिषद्को बैठकबाट सामाजिक सञ्जालको रूपमा प्रयोग भइरहेको टिकटकको प्रयोगमा लगाइएको रोक हटाउने निर्णय भएको हुँदा अर्को निर्णय नहुँदासम्मको लागि टिकटकमा लगाइएको रोक हटाउन दूरसञ्चार ऐन, २०५३ को दफा १५ ले दिएको अधिकार प्रयोग गरी सम्बन्धित सबै इन्टरनेट सेवा प्रदायकहरू र मोबाइल सेवा प्रदायकहरूलाई प्राधिकरणबाट निर्देशन जारी गरिएको छ ।’

यता, सञ्चार मन्त्रालयका प्रवक्ता गजेन्द्रकुमार ठाकुर भन्नुहुन्छ, ‘बुधबार र बिहीबार टिकटकका प्रतिनिधिहरूसँग छलफल भएको थियो । त्यसमा उनीहरू नेपाल सरकारका सबै सर्त मान्न तयार भएपछि नेपाल दूरसञ्चार प्राधिकरणलाई टिकटक पूर्ण रूपमा खोल्न मन्त्रालयले पत्र पठाएको हो ।’ पर्यटन प्रवद्र्धन, डिजिटल सुरक्षा र साक्षरताका लागि काम गर्नुपर्ने, सार्वजनिक शिक्षालाई गुणस्तर बनाउन सहयोग गर्नुपर्ने तथा सामाजिक सद्भाव खलल पार्ने ‘कन्टेन्ट फिल्टर’ गर्ने सर्तसहित टिकटक माथिको प्रतिबन्ध खुलेको उहाँले जानकारी दिनुभयो ।

तत्कालीन प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले २०८० कात्तिक २७ गते मन्त्रिपरिषद्बाट निर्णय गर्दै नेपालमा टिकटक बन्द गर्ने निर्णय गरेको थियो ।