काठमाडौं । आइसिसी विश्वकप लिग-२ त्रिकोणात्मक ओडिआई सिरिजमा नेपाल ओमानसँग पराजित भएको छ । क्यानडाको किंग सिटीमा बिहीबार बिहान सम्पन्न खेलमा नेपाल ओमानसँग एक विकेटले पराजित भएको हो । मंगलबार भएको पहिलो ओडिआईमा पनि नेपाल घरेलु टोली क्यानडासँग पराजित भएको थियो ।
नेपालले दिएको २२१ रनको लक्ष्य ओमानले ४९.५ ओभरमा ९ विकेट गुमाएर पूरा गर्यो । ४८औँ ओभरमा गुलशनले विकेट मेडन फ्याँकेपछि ओमानलाई अन्तिम २ ओभरमा १ विकेट रहँदा १० रन चाहिएको थियो । ४९औँ ओभरमा करण केसीले २ रनमात्र दिनुभयो । अन्तिम ओभरमा ८ रन आवश्यक पर्दा शकिल अहमदले दोस्रो बलमा चौका प्रहार गर्दै ओमानलाई जितनजिक पुर्याउनुभएको थियो । अन्तिम २ बलमा २ रन आवश्यक हुँदा कलिमउल्लाहले चौका प्रहार गर्दै ओमानलाई जित दिलाउनुभयो ।
ओमानका जतिन्दर सिंहले ४९ बलमा ३ चौका र १ छक्कासहित सर्वाधिक ४१ रन बनाउनुभयो । कश्याप प्रजापतीले ५२ बलमा ४ चौकासहित ३६ रनको योगदान दिनुभयो । नेपालका लागि गुलशन झा एक्लैले पाँच विकेट लिनुभयो । त्यस्तै करण केसीले दुई तथा सन्दीप लामिछाने र आरिफ शेखले एक÷एक विकेट लिनुभयो ।
त्यसअघि टस हारेर पहिले ब्याटिङको निम्तो पाएको नेपालले निर्धारित ५० ओभरमा ९ विकेट गुमाएर २२० रन बनाएको थियो । नेपालका लागि कप्तान रोहित पौडेलले ७२ बलमा २ चौका र ४ छक्कासहित सर्वाधिक ६० रनको इनिङ खेल्नुभएको थियो । तल्लोक्रममा गुलशन झाले ३५ बलमा ३ चौका र ५ छक्कासहित ५३ रनको महत्वपूर्ण इनिङ खेल्नुभयो । एक समय १३.१ ओभरमा ३१-३ को अवस्थामा पुगेको नेपाललाई चौथो विकेटका लागि रोहित र आरिफ शेखले ८३ रनको महत्वपूर्ण साझेदारी गर्नुभएको थियो । आरिफ शेख ८८ बलमा १ चौकासहित ३५ रनमा आउट हुनुभयो । ओपनर अर्जुन साउद ५, भीम सार्की, आरिफ शेख ११-११ तथा अनिल साह ३ रनमा आउट हुनुभयो ।
सोमपाल कामीले ८ बलमा २ छक्कासहित २० तथा सन्दीप लामिछाने १५ बलमा ११ रन जोड्नुभयो । ओमानका कलिमुल्लाह, फयाज बट, अकिब इलियासले २-२ विकेट लिनुभयो । सकिल अहमद र शोएब खानले १-१ विकेट लिनुभयो । जितपछि ओमान पाँच खेलमा पाँच अंकका साथ छैटौँ स्थानमा छ । पराजित नेपाल ६ खेलमा दुई अंकका साथ सातौँ स्थानमा छ । त्रिकोणात्मक सिरिजमा नेपाल र ओमानका साथै क्यानडाको पनि सहभागिता छ । त्रिकोणात्मक ओडिआई सिरिज असोज १० गतेसम्म हुनेछ ।
सिरिजको पहिलो खेलमा नेपाल घरेलु टोली क्यानडासँग १०३ रनको फराकिलो अन्तरले पराजित भएको थियो । नेपालले त्रिकोणात्मक ओडिआई सिरिजमा तेस्रो खेलमा असोज ६ गते क्यानडाको सामना गर्दा असोज ८ गते ओमानविरुद्ध खेल्नेछ । नेपाल पहिलो खेलमा क्यानडासँग १०३ रनले पराजित भएको थियो ।
नेपालले अब आइतबार क्यानडा र मंगलबार ओमानसँग खेल्नेछ । आठ टोली सहभागी लिग-२ का शीर्ष चार टोलीले २०२७ को एकदिवसीय विश्वकप छनोट सोझै खेल्न पाउनेछन् । ओडिआई सिरिज सकिएपछि तीन टोलीबीचमा टी-२० आई सिरिज हुनेछ । सिरिज असोज १२ देखि १७ गतेसम्म हुनेछ । त्यसपछि लिग टुको अर्को त्रिकोणात्मक सिरिज खेल्न नेपाली टोली अमेरिका जानेछ ।
नेपालबाट एकै खेलमा पाँच विकेट र अर्धशतक बनाउने गुलशन पहिलो खेलाडी
युवा अलराउण्डर गुलशन झा नेपालबाट ओडिआईमा एकै खेलमा पाँच विकेट लिनुका साथै ५० भन्दा माथि रन बनाउने पहिलो खेलाडी बन्नुभएको छ । बिहीबार बिहान ओमानसँग १ विकेटले पराजित भए पनि गुलशनले ५३ रन बनाउनुका साथै ५ विकेट लिनुभएको थियो । यसअघि नेपालबाट ओडिआईमा एकै खेलमा ५ वा त्योभन्दा माथि विकेट सन्दीप लामिछानेले र करण केसीले तीन/तीन तथा सोमपाल कामी र ललित राजवंशीले एक/एकपटक पूरा गर्नुभएको थियो । तर, सोही खेलमा अर्धशतक भने कुनै पनि खेलाडीले बनाउन सकेका थिएनन् ।
ओडिआई इतिहासमा एकै खेलमा ५ विकेट र ५० भन्दा बढी रन बनाउने उहाँ २४औँ खेलाडी बन्नुभएको छ । पछिल्लोपटक सन् २०२३ मा नेदरल्याण्ड्सका बास डि लिडेले स्कटल्याण्डविरुद्ध एकदिवसीय विश्वकप छनोट २०२३ जुलाईमा १२३ रन बनाउनुका साथै ५ विकेट लिनुभएको थियो । गुलशनले ओमानविरुद्ध ३५ बलमा ३ चौका र ५ छक्कासहित ५३ रन बनाउनुका साथै १० ओभरमा २ मेडनसहित ४७ रन खर्चेर ५ विकेट लिनुभयो । हारका बाबजुद गुलशन खेलको प्लेयर अफ द म्याच चुनिनुभयो ।
