काठमाडौं । सोमबार (आज) गोरखा क्याम्पसमा प्रदेश स्तरीय आङ्गिक क्याम्पस छात्रा भलिबल प्रतियोगिताको फाइनल खेल हुने भएको छ । स्वतन्त्र विद्यार्थी युनियन खेलकुद उपसमिति गोरखा क्याम्पसको आयोजनामा संचालित उक्त प्रतियोगिताको फाइनल खेल पृथ्वी नारायण क्याम्पस पोखरा र धौलागिरी क्याम्पस बागलुङ बीच हुने क्याम्पसका स्ववियु सचिव रचन परियारले बताए ।
प्रतियोगिताका लागि चार क्याम्पसहरुले सहभागिता जनाएका थिए । पृथ्वी नारायण क्याम्पस पोखरा, धौलागिरी क्याम्पस बागलुङ, कृषि क्याम्पस लमजुङ र आयोजक गोरखा क्याम्पस गोरखाले सहभागिता जनाएको बताइएको छ । प्रतियोगिताको पहिलो दिन आइतबार चार खेल सम्पन्न भएको छन् । पहिलो खेल धौलागिरी क्याम्पस बागलुङ र कृषि क्याम्पस लमजुङ बीच भएको थियो । उक्त खेलमा २ सेटले धौलागिरी क्याम्पस बागलुङ बिजयी बनेको छ ।
यस्तै, पृथ्वी नारायण क्याम्पस पोखरा र गोरखा क्याम्पस बीच भएको दोस्रो खेलमा २–१ अंकले पृथ्वी नारायण क्याम्पस विजयी बनेको छ । गोरखा क्याम्पस र धौलागिरी क्याम्पस बागलुङ बीच भएको तेस्रो खेलमा गोरखा क्याम्पसलाई २ सेटले हराउँदै बाग्लुङ बिजयी बनेको आयोजक गोरखा क्याम्पसले जनाएको छ । यसैगरी, पृथ्वी नारायण क्याम्पस पोखरा र कृषि क्याम्पस लमजुङ बीच भएको चौथो खेलमा लम्जुङलाई २ सेटले पराजित गर्दै पृथ्वीनारायण क्याम्पस पोखरा विजयी बनेको बताइएको छ ।
गोरखा क्याम्पसका स्ववियु सचिव रचन परियारको अध्यक्षता एवं प्रदेश सांसद नन्द प्रसाद न्यौपानेको प्रमुख आतिथ्यतामा आयोजित प्रतियोगितामा प्रमुख जिल्ला अधिकारी भोला दाहाल, गोरखा नगरपालिकाका पूर्व मेयर राजनराज पन्त, गोरखा क्याम्पसका क्याम्पस प्रमुख नवराज पाण्डे, स्ववियु सदस्य रचना बसेल लगायतले मन्तव्य राखेका थिए ।(दरौदी)
