काठमाडौं । नेपाली व्यवसायी फणिन्द्र पन्तले नेदरल्याण्ड्समा स्टार्टअप पुरस्कार जित्नुभएको छ । उहाँ नेदरल्याण्ड्सको गोइस मिरेन नगरपालिकाद्वारा आयोजित स्टार्टअप उद्यमी प्रतियोगितामा विजयी भई उक्त पुरस्कार जित्न सफल हुनुभएको हो ।

विश्वव्यापीरूपमा फैलिएको कोरोनापछि नेदरल्याण्ड्सको गोइस मिरेन क्षेत्रमा पसल र व्यवसायमा निकै रिक्तता देखिएको र उक्त अवस्थाबाट छुट्कारा पाउने उद्देश्यले स्थानीय सरकारद्वारा आयोजित प्रतियोगितामा नेपाली उद्यमी पन्त पुरस्कृत हुनुभएको हो । आर्थिक मन्दीबाट माथि उठ्ने दूरगामी योजनाअन्तर्गत स्थानीय सरकारले आयोजना गरेको उक्त प्रतियोगितामा सहभागिता जनाएका नयाँ व्यावसायिक योजना मूल्यांकन गरी विजेता छनोट गरेको थियो । पन्तले नेपालमा उत्पादित चिया, कफी, हिमालयन मसला, ऊनबाट निर्मित कपडा र हस्तकला नेदरल्याण्ड्समा बिक्री र विस्तार गर्दै आएको माउन्टेन मार्ट नेपाल ट्रेड हाउस नामक स्टार्टअप उद्यमशीलता योजना विजयी बनेको छ ।

सुरूमा प्रतिस्पर्धाका लागि २५ व्यावसायिक योजना स्वीकृत भएकामा अन्तिम चरणको प्रतिस्पर्धाका लागि १० वटा उत्कृष्ट छानिएका थिए । अन्तिम प्रतिस्पर्धामा पन्तसहित तीन व्यवसायीका योजनालाई विजयी घोषणा गरिएको हो । उहाँले पुरस्कार तथा व्यवस्थापन प्याकेजका लागि करिब ४० लाख नेपाली रुपैयाँ बराबरको रकम पाउनुभएको छ । नमस्ते कोअपरेटिभ युए नामक सहकारी कम्पनीमार्फत् नेपाली उत्पादन विदेश विस्तार गर्दै आउनुभएका पन्तले प्राप्त पुरस्कार नेपाल र नेपालीका लागि समर्पित भएको बताउनुभएको छ ।