काठमाडौं । सुदूरपश्चिम प्रदेशका सात वटा पहाडी जिल्ला जोड्ने एक मात्र सडक भीमदत्त राजमार्गमा परेको खाल्टाखुल्टीले दैनिक हजारौँ यात्रुले असहज यात्रा गर्नुपर्ने बाध्यता छ । सो राजमार्ग अन्तर्गत डडेलधुरा जिल्लामा पर्ने सडकखण्ड बिग्रिएकाले यात्रा कष्टकर हुँदै आएको छ ।

यो सडकखण्ड मर्मतका लागि सडक डिभिजन कार्यालय डोटीबाट करिब १३ करोड रुपियाँ लागतको छ वटा ठेक्का सम्झौता गरिएका छन् तर हालसम्म कामको सुरुवात नहुँदा सडकको स्तरोन्नति हुन सकेको छैन । नेपालीको महान चाड दसैँतिहार आउँदासम्म यात्रुले असहज यात्रा गर्नुपर्ने बाध्यता छ ।

ठेक्का सम्झौता भए पनि वर्षा र दसैँको मुखमा कामको सुरुवात गर्न नसकेको सडक डिभिजन कार्यालय कुलपाते डोटीका प्रमुख रमेश भट्टराईले जानकारी दिनुभयो । उहाँका अनुसार यस सडकखण्डको गैरा–अनारखोली खण्डमा पहिले पनि ठेक्का सम्झौता भएका थिए । ठेकेदारले काम नगरेपछि सम्झौता तोडेर निर्माण कम्पनीलाई कालो सूचीमा राखी हाल नयाँ ठेक्का सम्झौता गरिएका हुन् । नयाँ ठेक्का सम्झौता गरिएको दुई महिनासम्म पनि काम सुरु हुन सकेको छैन ।

गैरा–हगुल्टे सडकखण्डको आठ किलोमिटर मर्मतका लागि चन्द्रविकास जेभी धनगढीसँग पाँच करोड चार लाख रुपियाँ बराबरको ठेक्का सम्झौता भएको कार्यालयका सूचना अधिकारी रामचन्द्र जैसीले जानकारी दिनुभयो । उहाँका अनुसार २०८१ साउन १३ गते ठेक्का सम्झौता भएको थियो भने २०८२ जेठ ३० गतेसम्म निर्माण पूरा हुनुपर्ने छ ।

यस्तै भातकाँडा–साहुखर्क सडकखण्डको छ किलोमिटिर मर्मतका लागि रुद्रवती माँ निगलाशैनीसँग दुई करोड २६ लाख रुपियाँ बराबरको ठेक्का सम्झौता भएको छ । यसै गरी स्याउले–अनारखोलीको आठ किलोमिटर सडक मर्मतका लागि उमा इन्फा बिल्डर्स धनगढीसँग तीन करोड ७२ लाख रुपियाँ बराबरको ठेक्का सम्झौता भएको उहाँले जानकारी दिनुभयो । यी तीन वटै ठेक्का निर्माण हुने समय एउटै रहेको छ ।

उहाँका अनुसार यी तीन वटै सडकखण्ड निकै बिग्रिएका छन । बिग्रिएका सबै खण्डमा खाल्टाखुल्टी टाल्ने र त्यसमाथि एक ‘रियाप लेयर’ हाल्ने गरेर ठेक्का सम्झौता गरिएको छ । यसै गरी कैलाली जिल्लाको फल्टुडेदेखि बैतडीको अनारखोली बजारसम्मको सडकखण्डमा परेका खाल्टाखुल्टी टाल्न जय गणेश निर्माण सेवासँग ३२ लाख रुपियाँ, फल्टुडे–गैर खण्डका खाल्टाखुल्टी टाल्न ६८ लाख र गैरा–स्याउले सडकखण्डका खाल्टाखुल्टी टाल्न ७० लाख रुपियाँ बराबरका थप तीन गरेर नयाँ ठेक्का सम्झौता पनि भएको सूचना अधिकारी जैसीले जानकारी दिनुभयो ।(गोरखापत्र)