काठमाडौं । दोस्रो टी-२० क्रिकेटमा दक्षिण अफ्रिकाले भारतलाई हराएको छ । आइतबार राती सम्पन्न खेलमा घरेलु टोली दक्षिण अफ्रिकाले भारतलाई तीन विकेटले हराएको हो । भारतले दिएको १२५ रनको लक्ष्य दक्षिण अफ्रिकाले १९औँ ओभरमा सात विकेट गुमाएर भेट्टाएको हो । योसँगै अफ्रिकाले चार टी-२० म्याचको सिरिजमा एक-एकको बराबरी गरेको छ ।

कम स्कोरको खेलमा भारतीय टोलीले पहिला निर्धारित २० ओभरमा १२४ रन बनाएको थियो । जवाफमा आयोजक दक्षिण अफ्रिकाले ६ बल बाँकी रहँदै लक्ष्य पूरा गर्यो । अफ्रिकाको जितमा ट्रिस्टन स्टब्स र गेराल्ड कोएट्जीले महत्वपूर्ण योगदान दिनुभयो । स्टब्सले ४७ रन बनाउनुभयो भने कोएट्जीले ९ बलमा महत्वपूर्ण १९ रन बनाउनुभयो । यस्तै, रीजा हृयान्ड्रिक्सले २४ रन बनाउनुभयो ।

१२५ रनको लक्ष्य पछ्याएको दक्षिण अफ्रिकाको सुरुवात पनि राम्रो थिएन । अफ्रिकी टोलीले ४४ रनको स्कोरसम्म तीन विकेट गुमाएको थियो र ८६ रनको स्कोर पुग्दासम्म टोलीका सात ब्याट्सम्यान प्याभिलियन फर्किसकेका थिए । त्यसपछि ट्रिस्टन स्टब्स र गेराल्ड कोएट्जीबीचको अविजित ४२ रनको साझेदारीले अफ्रिकी टोलीको जित सुनिश्चित गरेको हो ।

भारतका वरुण चक्रवर्तीले दक्षिण अफ्रिकाविरुद्धको दोस्रो टेस्टमा चार ओभर बलिङ गर्दै १७ रनमात्र दिएर पाँच विकेट लिनुभयो । उहाँ टी–२० अन्तर्राष्ट्रिय खेलको एउटै इनिङ्समा पाँच वा सोभन्दा बढी विकेट लिने पाँचौँ भारतीय बलर बन्नुभएको छ । यसअघि भुवनेश्वर कुमार र कुलदीप यादवले दुई-दुईपटक यस्तो गर्नुभएको थियो । युजभेन्द्र चहल र दीपक चाहरले टी-२० खेलमा एक-एकपटक पाँच विकेट लिनुभएको छ । दुर्भाग्यवश वरुणको मिहिनेत खेर गयो ।

यसअघि पहिला ब्याटिङ गरेको भारतले २० ओभरमा ६ विकेट गुमाएर १२४ रन बनाएको थियो । भारतका लागि हार्दिक पाण्ड्याले सर्वाधिक ३९ रन बनाउनुभयो । अक्षर पटेलले २७ र तिलक बर्माले २० रन बनाउँदा अरूले दोहोरो अंकमा रन जोड्न सकेनन् । दक्षिण अफ्रिकाका पाँचजना खेलाडीले एक÷एक विकेट लिए । यसअघि पहिलो खेल भारतले जितेको थियो । अब सिरिजको तेस्रो खेल बुधबार हुनेछ ।