काठमाडौं । नेपाल चिकित्सक संघको आयोजनामा प्रथम नेपाल चिकित्सक संघ (एनएमए) खेलकुद प्रतियोगिता हुने भएको छ । एनएमएका महासचिव डा. सञ्जीव तिवारीले बिहीबार एक विज्ञप्ति जारी गरी चितवनको भरतपुरस्थित काशी खेल तथा मनोरञ्जन केन्द्रमा उक्त प्रतियोगिता हुन लागेको जानकारी दिनुभएको हो ।

आज (शुक्रबार) र शनिबार हुने उक्त प्रतियोगितामा फुटसल, भलिबल, बास्केटबल, टेबुलटेनिस, ब्याडमिन्टन, चेस तथा पौडीलगायतका खेल हुनेछन् । नेपाल चिकित्सक संघका अध्यक्ष डा. अनिलविक्रम कार्कीले देशभरका युवा चिकित्सक तथा स्वास्थ्यकर्मीलाई व्यस्त दिनचर्याबाट केही राहत महसुस गराउन तथा मनोरञ्जनका लागि प्रोत्साहित गर्न उक्त प्रतियोगिता आयोजना गरिएको बताउनुभयो ।