काठमाडौं । स्पिन इभेन्ट्सको आयोजनामा चौथो अल नेपाल अन्तरवडा टेबलटेनिस प्रतियोगिता हुने भएको छ । अखिल नेपाल टेबलटेनिस संघको तत्वावधानमा आगामी मंसिर ११ देखि १५ गतेसम्म उक्त प्रतियोगिता हुन लागेको हो । प्रतियोगिताका खेलहरू लैनचौर टेबलटेनिस हलमा हुनेछन् । आयोजकले बुधबार पत्रकार सम्मेलन आयोजना गर्दै प्रतियोगिताबारे जानकारी दिएको हो ।
प्रतियोगितामा मेन्स सिंगल्स, वुमेन्स सिंगल्स, ब्वाइज सिंगल्स यू-१६, गल्र्स सिंगल्स यू-१६, मेन्स टिम, वुमेन्स टिम, भेट्रान टिम (४० वर्षमाथि), मेन्स भेट्रान सिंगल्स (४० वर्षमाथि), वुमेन्स भेट्रान सिंगल्स (४० वर्षमाथि), मेन्स भेट्रान सिंगल्स (५० वर्षमाथि) र मेन्स भेट्रान सिंगल्स (६० वर्षमाथि) गरी कुल ११ स्पर्धा प्रतिस्पर्धा हुनेछ ।
प्रतियोगिताको मुख्य प्रायोजकमा खेलकुदप्रेमी सुमन खड्गी हुनुहुन्छ । सहप्रायोजकमा दि हृयाण्डीक्राफ्ट तथा खेलकुदप्रेमी रवि धाख्वा हुनुहुन्छ । प्रतियोगिताको आधिकारिक बल पार्टनरमा दि एच एस र क्लोडिङ पार्टनरमा गोर्खा एथलेटिक्स रहेका छन् ।
पत्रकार सम्मेलनमा आयोजक र सहप्रायोजकबीच सम्झौतापत्रमा हस्ताक्षर भएको थियो । प्रतियोगितामा ४५० जना खेलाडीले चुनौती प्रस्तुत गर्नेछन् ।
प्रतियोगिताको मेन्स/वुमेन्स टिम इभेन्ट्स, भेट्रान टिम (४० वर्षमाथि) का शीर्ष तीन खेलाडी (तेस्रो हुने दुई) लाई शिल्ड प्रदान गरिने जनाइएको छ । मेन्स/वुमेन्स सिंगल्स इभेन्ट्सका शीर्ष तीन (सेमिफाइनलिष्ट) खेलाडीले क्रमशः ३० हजार, १५ हजार र सात हजार पाँच सय नगद पुरस्कार, मेडल तथा प्रथम हुनेले ट्रफी पाउनेछन् ।
१६ वर्षमुनिका ब्वाइज सिंगल्स र गल्र्स सिंगल्स र भेट्रान्स सिंगल्समा पहिलो, दोस्रो र तेस्रो (सेमिफाइनलिस्ट) हुने खेलाडीले क्रमशः १० हजार, पाँच हजार र दुई हजार पाँच सय नगद पुरस्कारका साथै मेडल, च्याम्पियनले ट्रफी पनि पाउनेछन् ।
साथै स्वर्ण, रजत र कांस्य पदकका आधारमा सर्वोत्कृष्ट वडालाई रनिङ शिल्ड प्रदान गरिने आयोजकको भनाइ छ । मेन्स÷वुमेन्स सिंगल्स तथा १६ वर्षमुनि ब्वाइज सिंगल्स गल्र्स सिंगल्समा च्याम्पियन खेलाडीले अनर कम्पनीको एक्स सेभेन सी मोडलको मोबाइल फोन प्राप्त गर्नेछन् ।
