काठमाडौं । नेपाली खेल जगतकै चर्चित एनपिएलमा आठ टोलीको सहभागिता छ भने यो खेल कीर्तिपुरस्थित त्रिवि क्रिकेट मैदानमा भईरहेको छ । जसमा जनकपुर बोट्ल्स, विराटनगर किंग्स, कर्णाली याक्स, काठमाडौँ गोर्खाज, लुम्बिनी लायन्स, पोखरा एभेन्जर्स, चितवन राइनोज र सुदूरपश्चिम रोयल्स हुन् ।

नेपाल प्रिमियर लिग (एनपिएल)मा शुक्रबार कीर्तिपुरस्थित त्रिवि क्रिकेट मैदानमा भएका दुई खेलमा पोखरा एभेन्जर्स र कर्णाली याक्सले जित निकालेका छन् । बिहान भएको पहिलो खेलमा चितवन राइनोजलाई ६ विकेटले हराउँदै कर्णालीले पहिलो जित दर्ता गरेको हो भने दिउसो सम्पन्न भएको खेलमा पोखरा एभेन्जर्सले लुम्बिनी लायन्सविरुद्ध १० विकेटको शानदार जित निकालेको छ ।

आन्द्रियस गौस र दीनेश खरेलको कीर्तिमानी साझेदारीप्रेरित पोखरा एभेन्जर्सले नेपाल प्रिमियर लिग (एनपीएल)मा लुम्बिनी लायन्सविरुद्ध १० विकेटको शानदार जित निकालेको छ । जारी प्रतियोगितामा पोखराको तेस्रो खेलमा यो पहिलो जित हो भने लुम्बिनीको लगातार दोस्रो हार हो । लुम्बिनी यसअघि पहिलो खेलमा विराटनगर किंग्ससँग दुई विकेटले पराजित भएको थियो भने पोखरा पहिलो खेलमा चितवन राइनोजसँग ८७ रनले र दोस्रो खेलमा जनकपुर बोल्ट्ससँग सात विकेटले पराजित भएको थियो ।

अंकतालिकामा पोखराले खाता खोल्दा लुम्बिनी भने अंकविहीन छ । पोखराको जितपछि अंकतालिकामा पनि रोमाञ्चकता बढ्ने देखिएको छ । हाल तीन जितसहित जनकपुर बोल्ट्स शीर्ष स्थानमा छ भने सुदूरपश्चिम रोयल्स चार अंकका साथ दोस्रो स्थानमा छ । यस्तै, चार अंक रहेको चितवन राइनोज तेस्रो र दुई अंक रहेको कर्णाली याक्स चौथो तथा दुई अंक रहेको काठमाडौं गुर्खाज पाँचौँ र पोखरा छैटौँ स्थानमा तथा विराटनगर किङ्स सातौँ स्थानमा छ ।

शुक्रबार गौसले शतक र दीनेशले अर्धशतक बनाएपछि लुम्बिनीले प्रस्तुत गरेको १७१ रनको लक्ष्य पोखराले १६.५ ओभरमा विकेट नगुमाई भेट्टायो । प्रतियोगितामा यो विकेट आधारको सबैभन्दा ठूलो जित हो ।

पोखराको जितमा ओपनर गौसले अविजित १०४ रन जोडनुभयो । गौसले ५५ बलमा १२ चौका र पाँच छक्का प्रहार गर्नुभएको थियोे । योसँगै उहाँ एनपीएलमा शतक बनाउने पहिलो ब्याटरसमेत बन्नुभयो । लुम्बिनीविरुद्ध गौसले २० बलमा अर्धशतक र ५४ बलमा शतक पूरा गर्नुभएको थियो । गौससँगै अविजित रहनुभएका अर्का ओपनर दीनेश खरेलले ६१ रन बनाउनुभयो । ४६ बल खेल्नुभएका दिनेशले समान चार चौका र छक्का प्रहार गर्नुभएको थियो ।

पोखराका ओपनर आन्द्रियस गौस र दीनेश खरेलले १७६ रनको कीर्तिमानी साझेदारी बनाउनुभयो । जारी प्रतियोगितामा यो हालसम्मको सबैभन्दा ठूलो साझेदारी हो । गौस र दिनेशले यसअघि जनकपुरका हर्ष थाकेर र लहिरू मिलान्थाको नाममा रहेको कीर्तिमान तोड्नुभएको हो । यसअघि थाकेर र मिलान्थाले विराटनगर किंग्सविरुद्ध ११६ रनको साझेदारी गर्दै यो कीर्तिमान बनाउनुभएको थियो । पोखराविरुद्ध प्रभावहीन बनेको लुम्बिनीका सबै बलर विकेटविहीन रहे । लुम्बिनीले सात बलर प्रयोग गरे पनि कसैले विकेट निकाल्न सकेनन् ।

शतकबाट पाँच रनले चुकेका रोहित
त्यसअघि टस जितेर ब्याटिङमा आएको लुम्बिनीले निर्धारित २० ओभरमा पाँच विकेट गुमाएर १७० रनको योगफल खडा गरेको थियो । इनिङको अन्तिम बलमा रनआउट भएका लुम्बिनीका रोहितले ९५ रन बनाउनुभयो । शतक बनाउन पाँच रनले चुकेका रोहितले ५९ बलमा १० चौका र चार छक्का प्रहार गर्नुभएको थियो । प्रतियोगितामा रोहित अर्धशतक बनाउने १०औँ ब्याटर बन्नुभएको छ ।

४६-३ को कठिन स्थितिबाट रोहितले चौथो विकेटका निम्ति टम मोरिससँग ११० रनको शतकीय साझेदारी गर्दै लुम्बिनीको इनिङ सम्हाल्नुभएको थियो । जारी प्रतियोगितामा चौथो विकेटका निम्ति बनेको यो सबैभन्दा ठूलो साझेदारी हो । यसअघि चितवनका कुशल मल्ल र रवि बोपाराले ६८ रनको साझेदारी गर्दै यो कीर्तिमान बनाउनुभएको थियो । कुशल र रविले पोखराविरुद्ध नै यो साझेदारी बनाउनुभएको थियो ।

मोरिसले ४५ रन बनाउनुभयो । अर्धशतक बनाउन पाँच रनले चुकेका मोरिसले ३८ बलमा दुई चौका र दुई छक्का प्रहार गर्नुभएको थियो । मोरिसलाई १९औँ ओभरको अन्तिम बलमा आन्द्रियस गौसले रनआउट गर्नुभएको थियो ।

सन्दीप जोराले १८ रन बनाउनुभयो । सातौँ ओभरको पहिलो बलमा म्याट क्रिट्च्लीबाट एलबीडब्लूको धरापमा पर्नुअघि सन्दीपले १५ बलमा दुई चौका र एक छक्का प्रहार गर्नुभएको थियो । विवेक यादव दुई रनमा अविजित रहनुभयो ।

त्यसअघि लुम्बिनीका दुवै ओपनर डक भएका थिए । ओपनर आशुतोष घिरैया पहिलो ओभरको तेस्रो बलमा विपिन खत्रीबाट एलबीडब्लू आउट हुनुभएको थियो भने अर्का ओपनर उन्मुक्त चन्द पनि चार बल खेल्दै रन नजोडी पभेलियन फर्किनुभएको थियो । उन्मुक्तलाई तेस्रो ओभरको दोस्रो बलमा विपिन खत्रीले रेमन रेफरबाट क्याच गराउनुभएको थियो ।

पोखराका विपिन खत्रीले दुई विकेट लिनुभयो । तीन ओभर बलिङ गरेका विपिनले १८ रन खर्चिनुभयो । म्याच क्रिट्च्ली एक विकेट लिनुभयो ।

कर्णालीको पहिलो जित
एनपिएल क्रिकेटमा कर्णाली याक्सले पहिलो जित हात पारेको छ । शुक्रबार बिहान भएको पहिलो खेलमा चितवन राइनोजलाई ६ विकेटले हराउँदै कर्णालीले पहिलो जित दर्ता गरेको हो । चितवनले दिएको १३० रनको लक्ष्य कर्णालीले अन्तिम ओभरमा चार विकेट गुमाएर पूरा ग¥यो । पहिलो जितसँगै कर्णालीले दुई खेलको हारको शृंखलाई ब्रेक गर्दै दुई अंक जोडेको छ । यसअघि लगातार दुई खेल जितेर लयमा रहेको चितवनको यो पहिलो हार हो ।

कर्णालीका शिखर धवनले ४५ रन बनाएपछि कर्णालीले १३१ रनको लक्ष्य १९.५ ओभरमा ३ विकेट गुमाएर पूरा गरेको हो । चाडविक वाल्टनले ३० तथा देव खनालले २५ रन बनाउनुभयो । जिसान मक्सुदले अविजित १२ रन बनाउनुभयो । अन्तिम ओभरमा जितका लागि कर्णालीलाई ९ रन आवश्यक थियो ।

चितवनका रिजन ढकालको बलिङमा अर्जुनले सुरुवाती ३ बलमा २–२ रन जोडेपछि जितका लागि ३ बलमा ३ रन आवश्यक भयो । तर, चौथो बलमा अर्जुन रनआउट हुँदा २ बलमा ३ रन आवश्यक भयो । पाँचौ बलमा मक्सुदले चौका प्रहार गर्दै कर्णालीको जित सुनिश्चित गर्नुभयो । ओपनरद्वय शिखर धवन र देव खनालले पहिलो विकेटका लागि अर्धशतकीय साझेदारी गर्दै कर्णालीलाई गतिलो सुरुवात दिलाउनुभएको थियो । यो जोडीले पहिलो विकेटका लागि ९.५ ओभरमा ५३ रनको साझेदारी गरेको थियो । देव २५ रन बनाएर चितवनका कप्तान कुशल मल्लबाट एलबिडब्लु धरापमा पार्नुभयो । उहाँले ३४ बल खेल्दै १ चौका र १ छक्का प्रहार गर्नुभयो । धवनले १६औँ ओभरको दोस्रो बलमा लफ्टी इटनबाट कट एण्ड बोल्ड हुनुअघि ४१ बलमा ४ चौका र १ छक्का प्रहार गरी ४५ रन बनाउनुभयो । बलिङमा कुशल मल्ल, जान लफ्टी इटन र रवि बोपाराले १-१ विकेट लिनुभयो ।

यसअघि टस हारेर पहिले ब्याटिङ गरेको चितवनले निर्धारित २० ओभरमा सात विकेट गुमाएर १३० रन बनाएको थियो । चितवनका लागि इंग्लिस ब्याटर रवि बोपाराले अर्धशतक बनाउनुभयो । बोपाराले ४० बलमा अविजित ५९ रन बनाउनुभयो । उहाँले ७ चौका र १ छक्का प्रहार गर्नुभयो । इनिङ्सको अन्तिम बलमा चौका प्रहार गरेका अर्का भेट्रान शरद् भेषावकर ३ बलमा ६ रन बनाई अविजित रहनुभयो । दीपक बोहरा ८ र विपिन रावल ११ रनमा आउट हुनुभयो । बोपारा र कप्तान कुशल मल्लले चौथो विकेटमा ४९ बलमा ६० रन जोड्नुभएको थियो । मल्लले २७ बलमा २ चौका र १ छक्कासहित २३ रन बनाउनुभयो ।

कर्णालीका विपिन शर्माले ४ ओभरमा २१ रनमात्र खर्चेर ३ विकेट लिनुभयो । उहाँले १७ औँ ओभरमा यान निकोलास लफ्टी इटोन (९) र सोहेल तनवीर (०) लाई आउट गर्नुभएको थियो । १९औँ ओभरमा उहाँले अमरसिंह राउटेलालाई ९ रनमा बोल्ड गर्नुभयो । जिसन मक्सुदले ४ ओभरमा २२ रन खर्चेर २ विकेट लिनुभयो । सोमपाल कामी र नन्दन यादवले १-१ विकेट लिनुभयो । चितवनले पहिलो दुवै खेल जितेको थियो भने कर्णालीले पहिलो दुवै खेल हारेको थियो । चितवनले यसअघिका खेलमा काठमाडौं गुर्खाजलाई ५ विकेट र पोखरा राइनोजलाई ८७ रनले पराजित गरेको थियो । याक्स पहिलो दुई खेलमा जनकपुर बोल्ट्ससँग ८ विकेटले र गुर्खाजसँग ३ विकेटले पराजित भएको थियो ।

अंकतालिकामा पोखराले खाता खोल्दा लुम्बिनी अंकविहीन
अंकतालिकामा पोखराले खाता खोल्दा लुम्बिनी भने अंकविहीन छ । पोखराको यो जितपछि अंकतालिकामा पनि रोमाञ्चकता बढ्ने देखिएको छ । हाल तीन जितसहित जनकपुर बोल्ट्स शीर्ष स्थानमा छ भने सुदूरपश्चिम रोयल्स चार अंकका साथ दोस्रो स्थानमा छ । यस्तै, चार अंक रहेको चितवन राइनोज तेस्रो र दुई अंक रहेको कर्णाली याक्स चौथो तथा दुई अंक रहेको काठमाडौं गुर्खाज पाँचौँ र पोखरा छैटौँ स्थानमा तथा विराटनगर किङ्स सातौँ स्थानमा छ ।

आज दुई खेल
नेपाल प्रिमियर लिग (एनपिएल)मा आज (पहिलो खेल लुम्बिनी लायन्स र सुदूरपश्चिम रोयल्सबीच हुनेछ भने दोस्रो खेल कर्णाली याक्स र विराटनगर किङ्सबीच) दुई खेल हुँदै छन् । आगामी पुस ६ गतेसम्म हुने एनपिएलमा कुल ३२ खेल सञ्चालन हुनेछन् र फाइनल खेल पुस ६ गते हुनेछ ।