नेपाल प्रिमियर लिग: आजको खेल चितवन राइनोज र लुम्बिनी लायन्स तथा कर्णाली याक्स र पोखरा एभेन्जर्स

काठमाडौं । नेपाल प्रिमियर लिग (एनपिएल)मा आज(मंगलबार) दुई खेल हुँदै छन् । मंगलबार बिहान ९ बजे हुने खेलमा चितवन राइनोज र लुम्बिनी लायन्सले प्रतिस्पर्धा गर्ने छन् । चार खेल खेलिसकेको चितवन तीन जितमा ६ अंक बनाउँदै तालिकाको तेस्रो स्थानमा छ । चार खेल खेलिसकेको लुम्बिनी जितविहीन हुँदा खाता खोल्न सकेको छैन ।

दिउँसो १ बजे सुरु हुने दोस्रो खेलमा कर्णाली याक्स र पोखरा एभेन्जर्स भिड्दै छन् । चार खेल खेल्दा दुई जित र दुई हार खाएको कर्णालीको चार अंक छ भने तीनमा दुई खेल गुमाएको पोखराको दुई अंकमात्र छ । कर्णाली चार अंकसहित तालिकाको चौथो स्थानमा छ भने पोखरा पाँचाँै स्थानमा छ ।

एनपिएलका करिब आधा खेल सकिएका छन् । आठ फ्रेन्चाइज टोलीले प्रतिस्पर्धा गरिरहेको एनपिएलको पहिलो संस्करणमा हुने कुल ३२ खेलमध्ये आइतबारसम्म १५ खेल पूरा भएका छन् । आधा खेल सकिँदा अहिलेसम्म जनकपुर बोल्ट्स अपराजित छ । बाँकी सबै टोलीले कुनै न कुनै खेल हारेका छन् । आठ टिममध्ये लुम्बिनी लायन्स भने जितविहीन छ ।

चार खेलबाट आठ अंक जोडेको जनकपुर अंक तालिकामा पहिलो स्थानमा छ । दोस्रोमा सुदूरपश्चिम रोयल्स छ । चारमध्ये तीन खेल जितेको सुदूरपश्चिमको ६ अंक छ । सुदूरपश्चिम र चितवनको समान ६ अंक भए पनि रनरेटका आधारमा अंक तालिकामा सुदूरपश्चिम दोस्रो र चितवन तेस्रो स्थानमा छन् । चारमा दुई खेल जितेको कर्णाली चौथो स्थानमा छ भने एक/एक खेल जितेका पोखरा, काठमाडौं र विराटनगर क्रमशः पाँचौ, छैटौँ र सातौँ स्थानमा छन् । तालिकाको पुछारमा रहेको लुम्बिनी भने चार खेल खेलिसक्दासमेत अंकविहीन छ ।

खेल तालीका

अंक तालीका