काठमाडौं । नेपाल प्रिमियर लिग (एनपिएल)मा काठमाडौं गुर्खाजले लुम्बिनी लायन्सविरुद्ध १८ रनको जित निकालेको छ । काठमाडौंसँग पराजित भएसँगै लुम्बिनी एनपिएल-२०२४ को प्लेअफ दौडबाट बाहिरिने पहिलो टिम बनेको छ । लुम्बिनी एक खेलअगावै लिग चरणबाट बाहिरिने पक्का भएको हो । ६ खेल खेलिसकेको लुम्बिनीले जम्मा एक खेल जित्दा पाँच खेलमा हार बेहोरेको छ । लुम्बिनीले अब अन्तिम खेल जिते पनि प्लेअफ पुग्ने सम्भावना छैन भने जितसँगै काठमाडौंले प्लेअफ पुग्ने सम्भावना बढाएको छ । लुम्बिनीले अब लिगको अन्तिम खेल कर्णाली याक्ससँग खेल्ने छ ।

बुधबार कीर्तिपुरस्थित त्रिवि क्रिकेट मैदानमा सम्पन्न खेलमा काठमाडौंले प्रस्तुत गरेको १०४ रनको लक्ष्य पछ्याउने क्रममा लुम्बिनीले १९.२ ओभरमा सबै विकेट गुमाएर ८५ रनमात्र बनाउन सक्यो । प्रतियोगितामा काठमाडौंको यो दोस्रो जित हो । काठमाडौंले आफ्नो पहिलो खेलमा चितवन राइनोजसँग पाँच विकेटको हार बेहोरेको थियो । दोस्रो खेलमा कर्णाली याक्सविरुद्ध तीन विकेटको जित निकालेको काठमाडौंले तेस्रो खेलमा भने सुदूपश्चिम रोयल्सविरुद्ध ७३ रनको हार बेहोरेको थियो ।

काठमाडौंविरुद्ध लुम्बिनीका सन्दीप जोराले सर्वाधिक २६ रन बनाउनुभएको थियो । उहाँले २९ बलमा दुई चौका प्रहार गर्नुभएको थियो ।
उन्मुक्त चन्दले १९ बलमा एक चौकासहित १९ रन बनाउनुभयो भने सूर्य तामाङले अविजित रन जोड्नुभयो । लुम्बिनीका अन्य ब्याटर भने दोहोरो अंकसम्म पुग्न सकेनन् ।

लुम्बिनीका कप्तान रोहितकुमार पौडेल आठ रनमा पभेलियन फर्किनुभयो । यस्तै, ओपनर आशुतोष घिरैया चार, अर्जुन साउद तीन, टम मुरेस ६ र विवेक यादव दुई रनमा पभेलियन फर्किनुभयो । लुम्बिनीका साद बिन जफर ‘गोल्डेन डक’ हुनुभयो भने रेमोन सिमोन्ड्स पनि ‘डक’ हुनुभयो ।

लुम्बिनीलाई सस्तैमा समेट्न काठमाडौंका कप्तान करण केसीले चार विकेट लिनुभएको थियो । चार ओभर बलिङ गर्नुभएका करणले १६ रनमात्र खर्चिनुभयो । दीपेश कँडेलले तीन विकेट लिनुभयो । दिपेशले चार ओभर बलिङ गर्दा ६ रनमात्र खर्चिनुभयो । गेरहार्ड इरास्मसको नाममा दुई विकेट रहृयो भने राशिद खानले एक विकेट लिनुभयो ।

त्यसअघि टस जितेर ब्याटिङमा आएको काठमाडौंले १९.२ ओभरमा सबै विकेट गुमाएर १०३ रनको योगफल बनाएको थियो । सो क्रममा काठमाडौंका भीम सार्कीले सर्वाधिक ३१ रन बनाउनुभएको थियो । उहाँले ४० बलमा एक चौका प्रहार गर्नुभयो । डान डाउथवेटले २४ बलमा दुई छक्कासहित २१ बनाउनुभयो भने प्रतीक श्रेष्ठले १४ बलमा दुई छक्कासहित २० र स्टेफन एस्किनाजीले १६ बलमा दुई चौकासहित १३ रन बनाउनुभएको थियो । यसबाहेक काठमाडौंका अन्य ब्याटरले दोहोरो अंकमा रन जोड्न सकेनन् ।

काठमाडौंविरुद्ध लुम्बिनीका साद बिन जफरले तीन विकेट लिनुभएको थियो । चार ओभर बलिङ गर्नुभएका जफरले २१ रन खर्चिनुभयो । रेमोन सिमोन्ड्स र अभिषेक गौतमले समान दुई विकेट लिनुभयो भने सूर्य तामाङ र विवेक यादवको नाममा समान एक-एक विकेट रहृयो । करण प्लेयर अफ दि म्याच बन्नुभयो ।

जितसँगै चार अंक जोडेको काठमाडौं तालिकाको पाँचौँ स्थानमा उक्लिएको छ । काठमाडौंले चार खेलबाट चार अंक जोडेको छ ।

प्रतियोगितामा छैटौँ खेल खेलेको लुम्बिनीको यो पाँचौँ हार हो । लुम्बिनीले पहिलो खेलमा विराटनगर किंग्सविरुद्ध दुई विकेटको, दोस्रो खेलमा पोखरा एभेन्जर्सविरुद्ध १० विकेटको, तेस्रो खेलमा सुदूरपश्चिम रोयल्ससँग ४५ रनको र चौथो खेलमा जनकपुर बोल्ट्ससँग एक रनको साँघुरो हार बेहोरेको थियो । पाँचौँ खेलमा भने लुम्बिनीले चितवन राइनोजविरुद्ध ३३ रनको जित निकालेको थियो ।

जनकपुरको अपराजित यात्रामा पूर्णविराम, सुदूरपश्चिम शीर्षमा
नेपाल प्रिमियर लिग (एनपिएल) क्रिकेटमा सुदूरपश्चिम रोयल्सले जनकपुर बोल्ट्सलाई ७२ रनले पराजित गरेको छ । स्पिनरहरूको दबदबापछि सुदूरपश्चिमले लो स्कोरिङ खेलमा महत्वपूर्ण विजय हात पारेको हो । सुदूरपश्चिमका बलरको घातक बलिङसामु जनकपुरका ब्याटर निरीह हुँदा १२४ रनको लक्ष्य पछ्याएको जनकपुर १२.१ ओभरमा ५१ रन बनाउँदै अलआउट भयो । जारी एनपिएलमा यो सबैभन्दा न्यून स्कोर हो ।

एनपिएलमा जनकपुरको यो पहिलो हार हो । पहिलो हारसँगै जनकपुरले प्लेअफका लागि अझै कुर्नुपर्ने भएको छ । पाँच खेलपछि जनकपुर र सुदूरपश्चिमको समान आठ अंक भएको छ । सुदूरपश्चिम शीर्ष स्थानमा उक्लेको छ । जनकपुरसँग आठ रन भए पनि सुदूरपश्चिम राम्रो रन रेटका आधारमा शीर्ष स्थानमा छ । जनकपुरका लागि जोसुअ ट्रोम्पले सर्वाधिक १३ रन बनाउनुबाहेक अन्य खेलाडीले दोहोरो अंकमा रन जोड्न सकेनन् । जनकपुरलाई अलआउट गर्न सुदूरपश्चिमका लागि हरमित सिंह, दीपेन्द्र सिंह ऐरी र इशान पाण्डेले दुई-दुई विकेट लिनुभयो । सैफ जैब र नरेन साउदले समान १ विकेट लिनुभयो । स्कट कुगुलेइनेले बलिङ गरेको पहिलो बलमै विकेट लिनुभयो ।

यसअघि बुधबार बिहान त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा नौ विकेट गुमाएर १२३ रन बनाएको थियो । सुदूरपश्चिमका विनोद भण्डारीले सर्वाधिक ३३ रन बनाउनुभयो । ३७ बल खेल्नुभएका उहाँले तीन चौका र एक छक्का प्रहार गर्नुभयो । यस्तै, सैब जैबले २१ रन बनाउनुभयो । २१ बल खेल्नुभएका उहाँले दुई छक्का प्रहार गर्नुभयो । यसैगरी इशान पाण्डेले १७ र ब्राण्डन मुलेनले १० रन बनाउँदा अरूले दोहोरो अंकमा रन जोड्न सकेनन् । सुदूरपश्चिमलाई कम रनमै रोक्न जनकपुरका किशोर महतोले एक्लैले चार विकेट लिनुभयो । चार ओभर बलिङ गर्नुभएका उहाँले ३५ रन खर्चेर महत्वपूर्ण चार विकेट लिनुभएको हो । यस्तै, शेर मल्ल र अरनिको यादवले समान दुई/दुई विकेट लिनुभयो भने हर्ष ठाकेरले एक विकेट लिनुभयो ।

लिगको शीर्ष स्थानमा रहेको सुदूरपश्चिम रोयल्स आठ अंकसहित शीर्ष स्थानमा उक्लिएको छ । सुदूरपश्चिमसँग हारेसँगै अपराजित यात्रामा पूर्णविराम लागेको जनकपुर आठ अंकसहित दोस्रो स्थानमा छ । पाँच खेलबाट समान ६ अंक बनाएको चितवन राइनोज र कर्णाली याक्स क्रमशः तेस्रो र चौथो स्थानमा छन् ।

ब्रायन लारा एनपिएल हेर्न नेपाल आउने

वेष्ट इण्डिजका विश्व प्रख्यात क्रिकेटर ब्रायन लारा नेपाल प्रिमियर लिग (एनपिएल) हेर्न नेपाल आउनुहुने भएको छ । नेपाल क्रिकेट संघ (क्यान) ले महान् क्रिकेटर लारा एनपिएल हेर्न नेपाल आउन लागेको जानकारी दिएको हो । तर, क्यानले लारा नेपाल आउने समय भने खुलाएको छैन । लारा एक टेस्टमा चार सय रन प्रहार गर्ने एकमात्र ब्याट्सम्यान हुनुहुन्छ ।

उहाँले वेष्ट इण्डिजका लागि १३१ टेस्ट खेल्दै ३४ शतक र ४८ अर्धशतकसहित ११ हजार ९५३ रन बनाउनुभएको छ । यस्तै उहाँले २९९ एकदिवसीय अन्तर्राष्ट्रिय खेलमा १९ शतक र ६३ अर्धशतक हान्दै १० हजार ४०५ रन बनाउनुभएको छ ।

खेल तालीका