काठमाडौं । संकटा क्लबले ललित स्मृति एन्फा यू-१८ युथ लिगमा बुधबार विभागीय टोली त्रिभुवन आर्मी फुटबल क्लबविरुद्ध ३-१ को सहज जित दर्ता गरेको छ । जितसँगै १७ खेलमा ३३ अंक जोडेको संकटा दोस्रो स्थानमा उक्लिएको छ । पराजित आर्मी समान खेलबाट १२ अंकका साथ १०औँ स्थानमा छ ।

सातदोबाटोस्थित अखिल नेपाल फुटबल संघ (एन्फा) मुख्यालय मैदानमा संकटालाई जित दिलाउन कृष्णबहादुर आले, अनिश थापामगर र हिमेश माझीले गोल गर्नुभयो । आर्मीका लागि रोहित श्रेष्ठले गोल फर्काउनुभयो । पहिलो हाफको इन्जुरी समयमा कृष्णको गोलमार्फत् संकटाले अग्रता लिएको थियो ।

६५औँ मिनेटमा अनिशले टोलीको अग्रता दोब्बर बनाउनुभयो । चार मिनेटपछि नै हिमेशले संकटाका लागि तेस्रो गोल गर्नुभयो । ७७औँ मिनेटमा रोहितले गरेको गोल आर्मीका लागि सान्त्वना बन्यो ।