काठमाडौं । नेपाल प्रिमियर लिग (एनपिएल)मा विराटनगर किङ्सले दोस्रो जित दर्ता गरेको छ । विराटनगर किंग्सको दोस्रो जितले चितवन राइनोजको प्लेअफ यात्रामा धक्का लागेको छ । शुक्रबार कीर्तिपुरस्थित त्रिवि क्रिकेट मैदानमा भएको दोस्रो खेलमा विराटनगरले चितवनलाई ५१ रनले पराजित गर्दै एनपिएलमा दोस्रो जित निकालेको हो । शीर्ष चारको दौडबाट लगभग बाहिरिसकेको विराटनगरले छैटौँ खेलमा दोस्रो जित निकाल्दै अंक तालिकामा चार अंक बनाएको छ । विराटनगरले दुई खेलमा जित र चार खेलमा हार भोगेको छ ।

विराटनगरले एनपिएलको आफ्नो अन्तिम खेलमा काठमाडौं गुर्खाजसँग खेल्दै छ । शीर्ष चारको दौडमा रहेको काठमाडौं विराटनगरलाई हराउने रणनीतिमा हुने छ । सो खेलमा विराटनगरले जित निकाले पनि विराटनगर शीर्ष चारमा पुग्न कठिन छ । सो खेलमा विराटनगरलाई जित निकालेर मात्र पुग्दैन अन्य खेलमा काठमाडौं र पोखराको अन्य खेलको नतिजा पनि महत्वपूर्ण रहने छ । काठमाडौं र पोखरासँगै चितवनको खेलको नतिजा र नेट रनरेट पनि विराटनगरका लागि उत्तिकै आवश्यक छ ।

यता विराटनगरसँगको हारले चितवनको प्लेअफ यात्रामा भने धक्का पुगेको छ । चितवनले लिगको आफ्नो अन्तिम खेलमा आज (शनिबार) जनकपुर बोल्ट्सविरुद्ध खेल्दै छ । जनकपुर यसअघि नै प्लेअफमा पुगिसकेको छ । एनपिएलमा उपाधि दाबेदार टोलीका रूपमा रहेको बलियो जनकपुरलाई हराउन चितवनलाई केही कठिन भने पक्कै पर्ने छ ।

एनपिएलको ६ खेलमा तीन खेलमा जित र तीन खेलमा नै हार भोगेको चितवन ६ अंकका साथ तालिकाको चौथो स्थानमा यथावत् छ । चितवनले अन्तिम खेलमा पनि हार भोगेको अवस्थामा काठमाडौं, पोखरा र कर्णालीको नतिजाले पनि असर गर्ने छ ।

शुक्रबार विराटनगरले दिएको १८२ रनको प्रतिस्पर्धात्मक लक्ष्य पछ्याएको चितवनले निर्धारित २० ओभरमा ६ विकेटको क्षतिमा १३० रनमात्र बनाउन सक्यो । अमर राउटेलाले सर्वाधिक ४२ रन बनाए पनि अन्य ब्याटर चल्न नसक्दा तेस्रो पराजय भोग्न बाध्य भयो । राउटेला लोकेश बमको बलमा क्रिस सोलेको हातबाट क्याच आउट हुनुभएको थियो ।

ओपनर सन्तोष कार्की २८ रनमा सन्दीप लामिछानेको बलमा क्याच आउट हुनुभयो भने कप्तान कुशल मल्ल २५ रन बनाउँदा क्रिस सोलेको बलमा प्रतिश जिसीको हातबाट क्याच आउट हुनुभएको थियो । रवि बोपाराले २० रन बनाउँदा सुवास भण्डारीको बलमा बोल्ड हुनुभएको थियो ।

विराटनगरका लागि सन्दीप लामिछानेले दुई विकेट झार्नुभयो भने क्रिस सोल, बसिर अहमद, सुवास भण्डारी र लोकेश बलमे समान एक-एक विकेट लिनुभएको थियो । त्यसअघि कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको विराटनगरले निर्धारित २० ओभरमा पाँच विकेटको क्षतिमा १८१ रनको योगफल तयार पारेको थियो ।

बसिर अहमद ६८ र राजेश पुलामी ३३ रनमा अविजित रहनुभयो । मध्यक्रममा ब्याटिङमा आउनुभएका बसिर अहमदले बनाएको ६८ रन नै विराटनगरका लागि सर्वाधिक रहृयो । उहाँले ४४ बलमा चार चौका र चार छक्का प्रहार गर्नुभएको थियो । उहाँले ३९ बलमा अर्धशतक पूरा गर्नुभएको थियो ।

पाचौँ विकेटका लागि मार्टिन गप्टील र बसिर अहमदले ६५ रनको साझेदारी गर्दै विराटनगरको इनिङ्स उकास्नुभएको थियो । विराटनगर एक समय ६.२ ओभरमा ४-३३ को अवस्थामा थियो ।

ओपनर मार्टिल गप्टील ४५ रन बनाउँदै पभेलियन फर्कनुभएको थियो । ३५ बलमा एक चौका र चार छक्का प्रहार गर्नुभएका गप्टील कुशल मल्लको बलमा बोल्ड आउट हुनुभएको थियो । लोकेश बम शून्य रनमा नै रिजन ढकालको बलमा बोल्ड आउट हुनुभयो भने दीपक बोहोरा चार रनमा रिजनकै बलमा बोल्ड हुनुभयो ।

स्कट इडवार्ड शून्य रनमा पभेलियन फर्कंदा निकोलस किर्तोनले आठ रन बनाउनुभयो । उहाँ बसिर हमिदको बलमा एलबिडब्लु धरापमा पर्नुभएको थियो ।

चितवनका लागि रिजन ढकालले दुई विकेट लिनुभएको थियो भने सोहेल तनविर, बसिर हकिद र कुशल मल्लले समान एक–एक विकेट लिनुभयो ।

कर्णालीको प्लेअफ सम्भावना बलियो
नेपाल प्रिमियर लिग (एनपिएल)-२०२४ को आफ्नो अन्तिम खेलमा पनि लुम्बिनी लायन्सले हार बेहोरेको छ । शुक्रबार भएको खेलमा कर्णाली याक्ससँग लुम्बिनी पाँच रनले पराजित भएको हो । योसँगै लुम्बिनीले प्रतियोगिताका सात खेलमा एक जित र ६ हारको नतिजासहित आफ्नो यात्रा टुंग्याएको छ ।

शुक्रबार कीर्तिपुरस्थित त्रिवि क्रिकेट मैदानमा सम्पन्न खेलमा कर्णालीले प्रस्तुत गरेको १२९ रनको लक्ष्य पछ्याउने क्रममा लुम्बिनीले निर्धारित २० ओभरमा सात विकेट गुमाएर १२३ रनमात्र बनाउन सक्यो ।

जितसँगै कर्णालीले भने आफ्नो प्लेअफ सम्भावनालाई बलियो बनाएको छ । ६ खेलबाट आठ अंक जोडेको कर्णाली तालिकाको तेस्रो स्थानमा उक्लिएको छ । लुम्बिनीका टम मुरेसले सर्वाधिक ३६ रन बनाउनुभए पनि टिमको हार टार्न सक्नुभएन । उहाँले ३५ बलमा चार चौका र एक छक्का प्रहार गर्नुभएको थियो । ४०-३ को स्थितिबाट मुरेसले पाँचौँ विकेटका निम्ति सन्दीप जोरासँग ५१ रनको साझेदारी गर्दै लुम्बिनीको इनिङ सम्हाल्नुभएको थियो ।

सन्दीपले २१ बलमा दुई छक्कासहित २४ रन जोड्नुभयो भने ओपनर आशुतोष घिरैयाले २१ बलमा दुई चौकासहित १६ रन बनाउनुभयो । अर्जुन साउदले ६ बलमा तीन चौका प्रहार गर्दै १३ रन थप्नुभयो । कप्तान रोहितकुमार पौडेल व्यक्तिगत १० रनमा पभेलियन फर्किनुअघि आठ बलमा दुई चौका प्रहार गर्नुभएको थियो ।

कर्णालीका जिसान मक्सुदले दुई विकेट लिनुभयो । कप्तान सोमपाल कामी, नन्दन यादव, विपिन शर्मा र विलियम बोसिस्टोले समान एक विकेट लिनुभयो ।

त्यसअघि टस हारेर ब्याटिङमा आएको कर्णालीले निर्धारित २० ओभरमा आठ विकेट गुमाएर १२८ रनको योगफल बनाएको थियो ।
कर्णालीबाट विलियम बोसिस्टोले सर्वाधिक ४४ रन बनाउनुभयो । उहाँले ३० बलमा तीन चौका र तीन छक्का प्रहार गर्नुभएको थियो । अर्जुन घर्तीले २५ बलमा दुई चौका र एक छक्कासहित २५ रन बनाउनुभयो ।

४७-४ को स्थितिबाट यी दुईले पाँचौँ विकेटका निम्ति ७२ रनको साझेदारी गर्दै कर्णालीलाई सम्मानजनक योगफलसम्म पु¥याउनुभएको थियो ।

ओपनर बाबर हायातले २२ बलमा एक चौका र एक छक्कासहित २० रन बनाउनुभयो भने चान्डविक वाल्टनले १५ बलमा एक छक्कासहित १३ रन जोड्नुभयो । यसबाहेक कर्णालीका अन्य ब्याटरले दोहोरो अंकमा रन जोड्न सकेनन् ।

लुम्बिनीका विकास अग्रीले तीन विकेट लिनुभयो भने दुई ओभर बलिङ गर्नुभएका अग्रीले १४ रनमात्र खर्चिनुभयो । तिलक भण्डारीले दुई विकेट लिनुभयो भने रेमोन सिमोन्ड्स, साद बिन जफर र रोहितकुमार पौडेलले समान एक-एक विकेट लिनुभएको थियो ।

लिगका सुरुवाती दुई खेलमा हार बेहोरे पनि कर्णालीले त्यसपछिका तीन खेलमा भने लगातार जित निकालेको थियो । कर्णाली पहिलो खेलमा जनकपुर बोल्ट्ससँग आठ विकेट र दोस्रो खेलमा काठमाडौं गुर्खाजविरुद्ध तीन विकेटले पराजित भएको थियो ।

त्यसपछि कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन र पाँचौँ खेलमा पोखरा एभेन्जर्सविरुद्ध सात विकेटको जित निकालेको थियो ।

लुम्बिनीले भने सात खेलबाट दुई अंक जोड्दै प्रतियोगिताको अन्त्य गरेको छ । लुम्बिनीले प्रतियोगिताको सुरुवाती चार खेलमा लगातार हार बेहोरेको थियो । रोहितकुमार पौडेलको कप्तानीमा रहेको टोलीले पहिलो खेलमा विराटनगर किंग्सविरुद्ध दुई विकेट, दोस्रो खेलमा पोखरा एभेन्जर्सविरुद्ध १० विकेट, तेस्रो खेलमा सुदूरपश्चिम रोयल्सविरुद्ध ४५ रन र चौथो खेलमा जनकपुर बोल्ट्ससँग एक रनको हार बेहोरेको थियो ।

पाँचौँ खेलमा चितवन राइनोजविरुद्ध ३३ रनको जित निकाले पनि छैटौँ खेलमा लुम्बिनीले काठमाडौं गुर्खाजसँग १८ रनको हार बेहोरेको थियो ।

आजको खेल