काठमाडौं । आज (शनिबार)देखि झापा कप आरम्भ हुँदै छ । बिर्तामोडस्थित डोमालाल राजवंशी रंगशालामा आजदेखि झापा कप नकआउट फुटबल प्रतियोगिता सुरु हुँदै छ । बिहीबार सार्वजनिक गरिएको खेल तालिकाअनुसार झापा कपको उद्घाटन खेलमा काठमाडौंको त्रिभुवन आर्मी क्लब र मोरङको एलएक्स सिआइटी फुटबल क्लबबीच प्रतिस्पर्धा हुने भएको छ ।

झापा-११ फुटबल क्लबको आयोजनामा हुने प्रतियोगितामा आयोजक झापा-११ फुटबल क्लब, मोरङको एलएक्स सिटी फुटबल क्लब, सिरहाको सलहेस युवा क्लब, काठमाडौंको एनआरटी फुटबल क्लब, चर्च ब्वाइज युनाइटेड, इटहरीको राष्ट्रिय जागृति क्लब सहभागी हुने भएका छन् ।

यसैगरी दार्जिलिङको जिटिए, काठमाडौं जिल्ला लिग च्याम्पियनसमेत रहेको चित्लाङ फुटबल क्लब, त्रिभुवन आर्मी क्लब र रूपन्देहीको गोर्खा ब्वाइज स्पोर्ट्स क्लब सहभागी हुने भएका छन् । प्रतियोगिताको फाइनल खेल पुस ८ गते हुने छ । प्रतियोगिताका लागि १० हजारजना दर्शक क्षमताको बेम्बो प्याराफिट निर्माण, खेलमैदान मर्मतलगायतका काम पूरा भएको आयोजक झापा-११ का अध्यक्ष जलकुमार गुरुङले जानकारी दिनुभयो ।

प्रतियोगिताको विजेताले नगद १० लाख, ट्रफी, मेडल र प्रमाणपत्र पाउने छ । उपविजेताले पाँच लाख रुपैयाँ पुरस्कार पाउने आयोजक समितिका संयोजक केशवराज दाहालले बताउनुभयो । प्रत्येक खेलको प्लेयर अब द म्याचले १० हजार नगद तथा प्रतियोगिताको अवधिमा सर्वाधिक गोलकर्ता एकजना तथा उत्कृष्ट गोलकिपर एकजनालाई ३५ हजार नगद पुरस्कार प्रदान गरिने बताइएको छ । यसैगरी प्रतियोगिताको एक उदीयमान खेलाडीलाई झापा ट्यालेन्ट घोषणा गरेर नगद ३५ हजार रुपैयाँ प्रदान गरिने छ ।

यस्तै प्रतियोगिताको सर्वोत्कृष्ट एकजना खेलाडीलाई मष्ट भ्यालुएबल खेलाडी घोषित गरेर नगद एक लाख रुपैयाँ प्रदान गरिने झापा–११ का अध्यक्ष गुरुङले बताउनुभयो ।