काठमाडौं । नेपाल प्रिमियर लिगअन्तर्गत आफ्नो छैटौँ खेलमा सुदूरपश्चिमले पाँचौँ जित निकाल्दै अन्तिम खेल बाँकी हुँदै ‘क्वालिफायर’ मा स्थान बनाएको छ । आइतबार कीर्तिपुरस्थित त्रिवि क्रिकेट मैदानमा भएको खेलमा सुदूरपश्चिमले पोखरालाई पाँच रनले पराजित गर्दै अंकतालिकाको शीर्ष स्थानमा उक्लिएको हो ।

सुदूरपश्चिमले प्रस्तुत गरेको १५४ रनको लक्ष्य पछ्याउने क्रममा पोखराले १९.४ ओभरमा सबै विकेट गुमाएर १४८ रनमात्र बनाउन सक्यो । यो हारसँगै पोखराले सात खेलबाट ६ अंक जोड्दै प्रतियोगिताको अन्त्य गरेको छ । पोखरा प्लेअफ समीकरणबाट बाहिरिँदा सुदूरपश्चिमले भने शीर्ष चार स्थान पक्का गरेको हो । ६ खेलबाट १० अंक जोडेको सुदूरपश्चिम तालिकाको शीर्षस्थानमा उक्लिएको छ ।

पोखराका आन्द्रियस गौसले २१ बलमा चार चौका र दुई छक्कासहित सर्वाधिक ३६ रन बनाउनुभयो । रेमोन रेफरले २८ बलमा दुई चौका र दुई छक्कासहित ३३ रन जोड्नुभयो भने किरण ठगुन्नाले २८ बलमा तीन चौका र एक छक्का प्रहार गर्नुभयो । यी दुईले ६९-५ को स्थितिबाट छैटौँ विकेटका निम्ति ७० रनको साझेदारी गर्दै पोखराको मध्यक्रम सम्हाल्नुभएको थियो । यसबाहेक ओपनर दिनेश खरेलले १५ र जेन मलिकले १० रन बनाउनुभयो भने सुदीप अर्याल ‘डायमन्ड डक’ हुनुभयो ।

सुदूरपश्चिमका स्कट कुग्गेलेनले पाँच विकेट लिनुभयो । ३.४ ओभर बलिङ गर्नुभएका कुग्गेलेनले एक मेडन फ्याँक्दै १८ रन खर्चिनुभएको थियो । कुग्गेलेनले अन्तिम ओभरको चार बलमा पोखराका तीन ब्याटरलाई पभेलियनको दिशा देखाउनुभएको थियो ।
हर्मित सिंहले तीन विकेट लिनुभयो भने सैब जैबको नाममा एक विकेट रहृयो ।

त्यसअघि टस हारेर ब्याटिङमा आएको सुदूरपश्चिमले निर्धारित २० ओभरमा सात विकेट गुमाएर १५३ रनको योगफल खडा गरेको थियो । सुदूरपश्चिमका आरिफ सेखले सर्वाधिक ४२ रन बनाउनुभयो । उहाँले ३८ बलमा दुई चौका र एक छक्का प्रहार गर्नुभएको थियो । ब्रान्डन म्याकमुलमले १६ बलमा एक चौका र दुई छक्कासहित २३ रन जोड्नुभयो । कप्तान दीपेन्द्रसिंह ऐरीले १६ बलमा एक चौकासहित २० रन बनाउनुभयो ।

यस्तै, ओपनर विनोद भण्डारीले १४ रन थप्दा हर्मित सिंहले १३ र इशान पाण्डेले १० रन बनाउनुभयो । इशान १९औँ ओभरको पहिलो बलमा ‘रिटायर्ड आउट’ हुनुभएको थियो । पोखराका कप्तान कुशल भुर्तेलले दुई विकेट लिनुभयो भने चार ओभर बलिङ गर्नुभएका कुशलले २७ रन खर्चिनुभयो । यस्तै, रेमोन रेफर, सागर ढकाल र माइकल लियस्कले समान एक–एक विकेट लिनुभएको थियो ।

तीन खेलमा जितनजिक पुगेर खेल गुमाउँदा फरक नतिजा आयो : केभिन
विराटनगर किंग्सका प्रशिक्षक केभिन ओ ब्रायनले तीन खेलमा जितनजिक पुगेर पनि खेल गुमाउनुपरेकाले प्लेअफमा पुग्न असफल भएको बताउनुभएको छ । काठमाडौं गुर्खाजसँग हार बेहोर्दै नेपाल प्रिमियर लिग (एनपिएल) को पहिलो सिजनमा यात्रा टुंग्याएपछि प्रशिक्षक केभिनले पत्रकारसँग कुरा गर्दै परिस्थितिलाई राम्ररी बुझेर खेल्न नसक्दा असफल भएको जिकिर गर्नुभयो । उहाँले कठिन परिस्थितिमा सही निर्णय लिन पनि समस्या भएको उल्लेख गन्नुभयो । बलिङ, ब्याटिङ र फिल्डिङमा पनि शतप्रतिशत इफोर्ट लगाउन नसकेको उहाँको भनाइ थियो । उहाँले पहिलो तीन-चार खेलमा ब्याटिङमा पनि आफ्नो टोलीले संघर्ष गर्नुपरेको बताउनुभयो । विकेट बुझ्न विदेशी खेलाडीका लागि गाह्रो परेको उहाँको भनाइ थियो ।

कप्तान सन्दीप लामिछानेले विकेट लिन नसक्दा पनि टोलीमाथि दबाब परेको हो भन्ने प्रश्नमा उहाँले एउटा बलरलाई मात्र दोष दिन नहुने र पछिल्ला खेलमा सन्दीपले पनि राम्रो गरेको बताउनुभयो ।

केही खेलाडी बिरामी हुँदा पनि समस्या परेको उहाँको भनाइ थियो । उहाँले प्रतियोगिता छोटो रहेकाले फर्ममा नरहेका खेलाडीको लयमा फर्किन पनि समय लागेको बताउनुभयो । सन् २०१८ मा एभरेस्ट प्रिमियर लिग खेल्न आउँदाको समयभन्दा अहिले धेरै राम्रो घरेलु खेलाडीहरू रहेको उहाँले सुनाउनुभयो ।

कर्णाली र काठमाडौं ‘रेडजोन’मा
नेपाल प्रिमियर लिग (एनपिएल) को समूह चरणबाट काठमाडौं गुर्खाज र कर्णाली याक्समध्ये एक टोली बाहिरिने पक्का भएको छ । अब बाहिरिने एक टोली र पहिलो क्वालिफायरमा पुग्ने दुवै टोलीको टुंगो आज (सोमबार) बिहान हुने समूह चरणको अन्तिम खेलपछि मात्रै लाग्ने भएको छ ।

समूह चरणबाट काठमाडौं र कर्णालीमध्ये एउटा टोली बाहिरिने पक्का भए पनि पहिलो क्वालिफायरमा पुग्ने दुवै टोलीको टुंगो अन्तिम खेलबाट लाग्ने छ । तर, पहिलो क्वालिफायरमा सुदूरपश्चिम, जनकपुर र कर्णालीमध्ये दुई टोली हुने छन् ।

प्लेअफमा भने जनकपुर, कर्णाली र काठमाडौंमध्ये एक टोलीले चितवनसँग भिड्ने निश्चित जस्तै छ । पहिलो क्वालिफायरमा सुदूरपश्चिमको सम्भावना बलियो छ । यता बाहिरिने जोखिममा सबैभन्दा धेरै काठमाडौंको छ ।

तर, अन्तिम खेलमा सुदूरपश्चिमसँग फराकिलो अन्तरमा कर्णाली पराजित भएर नेट रनरेटमा काठमाडौंभन्दा पछि परेमा कर्णाली बाहिरिने छ । त्यो अवस्थामा जनकपुर र सुदूरपश्चिमले पहिलो क्वालिफायर खेल्ने छन् । चितवन र काठमाडौंको प्लेअफ भिडन्त हुने छ ।
कर्णाली र काठमाडौं प्लेअफ नपुग्ने जोखिममा रहिरहँदा चितवन राइनोजको भने प्लेअफमा स्थान सुरक्षित भइसकेको छ । काठमाडौं र कर्णालीभन्दा नेट रनरेटमा अगाडि रहेकाले अन्तिम खेलको नतिजाले चितवनलाई कुनै असर नपर्ने भएको हो । त्यो खेलको नतिजाले चितवनको प्लेअफमा हुने प्रतिस्पर्धी टोलीको टुंगो लाग्ने छ ।

आज (सोमबार)को खेलमा कर्णाली विजयी भएमा चितवनले प्लेअफमा जनकपुरसँग खेल्ने सम्भावना बढी छ । तर, त्यो खेलमा सुदूरपश्चिम विजयी भएमा जनकपुर र सुदूरपश्चिमले पहिलो क्वालिफायर खेल्ने छन् । यी दुई टोलीको समूह चरणको खेलमा सुदूरपश्चिमले फराकिलो अन्तरमा पराजित गरेको थियो ।

यस्तै समूहको आफ्नो अन्तिम खेलमा जनकपुर र चितवन भिडेका थिए । उक्त खेलमा महत्वपूर्ण जित निकाल्दै चितवनले पनि अन्तिम चारमा स्थान पक्का गरेको हो । आइतबार बिहानको खेलमा काठमाडौं विजयी भए पनि रनरेटमा अपेक्षित सुधार नहुँदा बाहिरिने खतरा नटरेको हो । यदि चितवनको भन्दा राम्रो रनरेट बनाएको भए काठमाडौंको पनि प्लेअफमा स्थान पक्का हुने थियो । काठमाडौं रनरेटकै कारण सबैभन्दा पछाडि परेको हो । तर, आज (सोमबार)को खेलमा कर्णाली पराजित भए नेट रनरेटसमेत घट्ने भएकाले काठमाडौंको पनि प्लेअफको सम्भावना कायम नै रहेको हो ।

समूह चरणका ६ खेलमा चितवनसँग मात्रै पराजित भएको सुदूरपश्चिम र जनकपुरको समान १० अंक छ । तर, सुदूरपश्चिमले अन्तिम खेल खेल्न बाँकी नै छ । जनकपुर समूह चरणमा चितवन र सुदूरपश्चिमसँग पराजित भएको थियो । अब पुनः यी टोलीमध्ये एकसँगै भेट हुने पक्का भएको हो । दुवै टोलीसँग फेरि खेल्ने सम्भावना पनि कायम छ ।

लिगको अंकतालिकामा तेस्रो र चौथो स्थानमा रहने टोलीको इलिमिनेटर खेल बुधबार बिहान ९ बजे हुने छ । त्यसै दिन दिउँसो १ बजे पहिलो क्वालिफायर खेल हुने छ । क्वालिफायरमा विजयी हुने टोली सिधै फाइनलमा पुग्ने छ । तर, पराजित टोलीले पनि फाइनल प्रवेशका लागि पुनः मौका पाउने छ । पहिलो क्वालिफायरमा पराजित टोली र इलिमिनेटरमा विजयी टोलीबीच दोस्रो क्वालिफायर खेल हुने छ । यो खेल बिहीबार मध्याहृन १२ः१५ बजेका लागि तय भएको छ । फाइनल खेल आगामी शनिबार मध्याहृन १२ः१५ बजे नै त्रिवि क्रिकेट मैदानमा हुने छ ।

आज निर्णायक खेल
सोमबार हुने लिग चरणको अन्तिम खेलमा सुदूरपश्चिम र कर्णाली याक्स भिड्ने छन् । यदि सो खेलमा कर्णाली विजयी भए शीर्ष टिमको टुंगो रनरेटका आधारमा हुने छ । तर, सुदूरपश्चिम विजयी भएमा ऊ पहिलो हुने छ भने जनकपुर दोस्रो र चितवन राइनोज तेस्रो हुने छ । चौथो हुने टिम कर्णाली र काठमाडौं गुर्खाजमा जसको रनरेट राम्रो छ, उही छनोट हुने छ । यसकारण सोमबारको अन्तिम खेल पनि निकै रोमाञ्चकमात्र होइन, निर्णायकसमेत बन्ने छ ।

खेल तालीका