काठमाडौं । धरानका प्रो निरज तामाङले कुलस्कोरको रेकर्ड बराबरी गर्दै सूर्य नेपाल गल्फ टुर २०२४-२५ अन्तर्गत तेस्रो प्रतियोगिता सूर्य नेपाल इस्टर्न ओपनको उपाधि जित्नुभएको छ । उहाँले धरानकै प्रो शुक्रबहादुर राईको रेकर्ड बराबरी गर्ने क्रममा १७-अन्डर १९३ को स्कोरसहित करियरको दोस्रो उपाधि जित्नुभएको हो । ५-अन्डर ६५ को उत्कृष्ट स्कोरमा निरजले विष्णुप्रसाद शर्मालाई १० स्ट्रोकको फराकिलो अन्तरमा हराउनुभयो । उपाधिसँगै निरजले एक लाख ५० हजार प्राप्त गर्नुभएको छ ।

पार ७० को धरान गल्फ क्लबमा ७-अन्डर २०३ स्कोरसहित विष्णु दोस्रो हुँदै नगद एक लाख रुपैयाँ प्राप्त गर्नुभयो भने धरानका बलभद्र राई ३-अन्डर २०७ सहित तेस्रो हुँदै ७५ हजार जित्न सफल हुनुभयो । सात स्ट्रोकको अग्रतासहित अन्तिम १८ होलको खेलको सुरुवात गर्नुभएका निरजले एकपक्षीय शैलीमा उपाधि जित्नुभयो भने भुवन नगरकोटी र रवि खड्का २-अन्डर २०८ सहित चौथो स्थानमा रहँदै जनही ५५ हजार प्राप्त प्राप्त गर्नुभयो ।

समग्रमा १-अन्डर २०९ को नतिजामा धनबहादुर थापा (७०) र भुवनकुमार रोक्का (७३) छैटौँ हुँदै जनही ४४ हजार नगद पुरस्कार हात पार्नुभयो भने रामे मगर (७१) आठौँ हुँदै ३८ हजार नगद पुरस्कार प्राप्त गर्नुभयो । प्रतियोगिताका विजयी खेलाडीलाई सूर्य नेपाल प्रालिका डेपुटी जनरल म्यानेजर केशव प्रधान र नेपाल गल्फ संघका उपाध्यक्ष तिलक राईले पुरस्कार वितरण गर्नुभएको थियो ।