काठमाडौं । दुई हप्तामै तीनपटक सगरमाथाको आरोहण गर्नुभएकी फोटो पत्रकार पूर्णिमा श्रेष्ठ सिएनएनको साहसी खेलाडीको सूचीमा पर्नुभएको छ । उहां पेशाले फोटो पत्रकार हुनुहुन्छ । पूर्णिमा सिएनएनको ‘द एक्स्ट्रिम एथलेट्स हु पुस्ड लिमिट इन २०२४’ को सूचीमा पर्नुभएको हो ।

एकै सिजनमा तीनपटक सगरमाथा चढ्ने उहाँ विश्वकै पहिलो महिला आरोही हुनुहुन्छ । उहाँले गत मे १२, १९ र २५ मा लगातार सगरमाथाको आरोहण गर्नुभएको थियो । सिएनएनको साहसी खेलाडीको सूचीमा परेसँगै उहाँले सामाजिक सञ्जालमार्फत् आफूले गौरवान्वित महसुस गरेको बताउनुभएको छ । ‘यो वर्ष, सन् २०२४ मेरो जीवनको एक ऐतिहासिक वर्ष बन्न पुग्यो । यसै वर्ष म एउटै आरोहण सिजनमा तीनपटक विश्वकै सर्वोच्च शिखर सगरमाथाको सफल आरोहण गर्ने संसारकै पहिलो र एकमात्र महिला बन्न सफल भएँ,’ उहाँले भन्नुभएको छ । श्रेष्ठ सातौँ अग्लो हिमाल धौलागिरि चढ्ने पहिलो नेपाली महिला पनि हुनुहुन्छ ।

‘मेरो शरीर थकित भएको थियो । म आफूलाई कहिलेकाहीं मूर्ख महसुस गर्थें । उद्देश्यबाट पछि हटौँ कि जस्तो लाग्थ्यो,’ सिएनएन स्पोर्टसँग उहाँले भन्नुभएको छ । धेरै खर्चका कारण यो काम मुस्किल भए पनि आफ्नो सपनामा अडिग भएकाले सफल हुन सकेको उहाँको बुझाइ छ ।