काठमाडौं । काठमाडौंको भृकुटीमण्डपमा दक्षिण एसियाली दोस्रो अन्तर्राष्ट्रिय पुस्तक प्रदर्शनी-२०८१ सुरु भएको छ । नेपाल पुस्तक तथा स्टेसनरी व्यवसायी महासंघ र करेन्ट मिडिया एण्ड रिसर्च सेन्टरको संयुक्त आयोजनामा मेला सुरु गरिएको हो । मेलामा नेपालका साथै चीन, भारत, जिम्बाबे, थाइल्याण्ड, श्रीलंका, क्यानडा र बंगलादेशका प्रकाशक तथा लेखकहरूको सहभागिता रहेको छ । पठन संस्कृतिको विकास र प्रवद्र्धन गरी देशमा शैक्षिक, बौद्धिक जनशक्ति उत्पादनको लक्ष्यसहित सुरु भएको दोस्रो दक्षिण एसिया अन्तर्राष्ट्रिय पुस्तक प्रदर्शनी-२०८१ पुस २१ गतेसम्म चल्ने आयोजकले जनाएको छ । ‘चेतनाका लागि गुणस्तरीय शिक्षा र गुणस्तरीय शिक्षाका लागि गुणस्तरीय शैक्षिक सामग्री’को सिद्धान्त र आवश्यकता आत्मसात गरी मेला आयोजना गरिएको महासंघका अध्यक्ष शिव सागर शर्माले बताउनुभएको छ ।
मेलामा १५० भन्दा बढी स्टल रहेका महासंघका महासचिव विष्णुप्रसाद पौडेलले जानकारी दिनुभयो । मेलाले दक्षिण एसियाली राष्ट्रबीच शिक्षा, साहित्य, कला, संस्कृति र सञ्चारको आदानप्रदानका माध्यमबाट समेत आपसी सम्बन्ध प्रगाढ बनाउनमा महत्वपूर्ण भूमिका खेल्ने अपेक्षा गरिएको छ । प्रदर्शनीमा स्वदेश तथा विदेशी प्रकाशकहरूबीच कपीराइट टेबल म्याचिङ हुने नेपाल पुस्तक तथा स्टेसनरी व्यवसायी महासंघका अध्यक्ष शिव सागरले बताउनुभयो । उहाँले भन्नुभयो, ‘यो प्रदर्शनीमा भएको कपीराइट टेबल म्याचिङ नेपालमा पहिलोपटक अभ्यास गरिएको छ । अहिले प्रकाशक र लेखकहरू छलफल गरिरहनुभएको छ, उहाँहरूको निचोड आएपछि हामी अन्तिम दिन कुन–कुन प्रकाशक र लेखकहरूको कपीराइट टेबल म्याचिङ तथा प्रकाशन सहकार्य भएको जानकारी दिन्छौँ ।’
पुस्तक प्रदर्शनीमा १३ देशका प्रकाशक, लेखक, निर्यात तथा विभिन्न शैक्षिक सामग्री उत्पादकहरूको सहभागिता रहेको छ । पठन संस्कृतिको विकास र पठन शैलीको निरन्तरताका लागि मूलनाराका साथ स्थापना भएको बताउँदै अध्यक्ष सागरले भन्नुभयो, ‘प्रदर्शनीमा चीन, भारत, जिम्बाबे, थाइल्याण्ड, श्रीलंका, क्यानडा र बगलादेशलगायतका प्रकाशक तथा लेखकहरू रहेका छन् ।
सामाजिक रूपान्तरणका लागि गुणस्तरीय शिक्षा र गुणस्तरीय शिक्षाका लागि गुणस्तरीय शैक्षिक सामग्रीको आवश्यकता पर्ने कुरालाई आत्मसात गरी प्रदर्शनी आयोजना गरिएको हो । प्रदर्शनीमा देशभरबाट मात्र नभई दक्षिण एसियाली क्षेत्रका राष्ट्रहरूको समेत सहभागिता रहेकाले स्वदेशी तथा विदेशी शैक्षिक सामग्रीहरूको आयात, निर्यात वितरणमा सहकार्य एवं सहजीकरणको वातावरण बन्नुका साथै यस महोत्सवले दक्षिण एसियाली राष्ट्रहरूबीच शिक्षा साहित्य, संस्कृति र सञ्चार आदानप्रदानका माध्यमबाट समेत आपसी सम्बन्ध प्रगाढ बनाउन महत्वपूर्ण भूमिका खेल्ने विश्वास गरिएको छ ।
