काठमाडौं । एप्पलले चीनमा नयाँ आईफोन मोडेलमा दुर्लभ अर्थात् हालसम्म नदिइएको दरमा छुटहरूको घोषणा गरेको छ। अमेरिकी टेक जायन्ट एप्पलले ह्वावेजस्ता आफ्ना घरेलु प्रतिस्पर्धीहरू विरुद्ध बजार हिस्सालाई बचाउनको लागि यस्तो कदम चालेको हो।

एप्पलको वेबसाइट अनुसार जनवरी ४ देखि ७ सम्म चल्ने यो चार-दिने प्रचार कार्यक्रमले तोकिएका भुक्तानी विधिहरू प्रयोग गर्दा केही आईफोन मोडेलहरूमा छुट लागू गर्नेछ रोयटर्सले उल्लेख गरेको छ।

फ्ल्यागशिप आईफोन १६ प्रोको सुरुवाती मूल्य ७,९९९ युआन, आईफोन १६ प्रो म्याक्सको सुरुवाती मूल्य ९,९९९ युआन छ भने यी दुवैमा सबैभन्दा धेरै ५०० युआन छुट दिइनेछ। आईफोन १६ र आईफोन १६ प्लसमा भने ४०० युआन छुट प्रदान गरिने रोयटर्सले उल्लेख गरेको छ।

यी छुटहरू चीनको सुस्त अर्थतन्त्र र मूल्य घट्ने दबाबको कारण ग्राहकहरू खर्च गर्न सतर्क भइरहेका बेला आएको हो। नोभेम्बरमा चीनको उपभोक्ता मुद्रास्फीति पाँच महिनाको न्यूनतममा पुगेको थियो।

एप्पल हाल चीनको सबैभन्दा ठूलो स्मार्टफोन बजारमा घट्दो बजार हिस्साको सामना गरिरहेको छ जहाँ स्थानीय उत्पादकहरूले प्रतिस्पर्धा तीव्र बनाएका छन्।

ह्वावेले अगस्ट २०२३ मा प्रिमियम सेग्मेन्टमा फिर्ता भएसँगै चीनमा सशक्त चुनौती प्रस्तुत गरेको छ। स्थानीय रूपमा निर्मित चिपसेटहरू सहित ह्वावेले गत साता एक प्रमुख इ-कमर्स प्लेटफर्ममा मोबाइल फोनलगायतका उच्च-स्तरीय उपकरणहरूको मूल्य ३,००० युआनसम्म घटाएको थियो।

एप्पल २०२४ को दोस्रो त्रैमासिकमा चीनका शीर्ष पाँच स्मार्टफोन विक्रेताहरूको सूचीबाट बाहिरिएको थियो तर तेस्रो त्रैमासिकमा पुन: फर्किएको थियो।

तर, अनुसन्धान संस्था आईडीसीका अनुसार तेस्रो त्रैमासिकमा एप्पलका स्मार्टफोन बिक्री गत वर्षको सोही अवधिसँग तुलना गर्दा ०.३ प्रतिशत घटेको थियो भने ह्वावेको बिक्री ४२ प्रतिशतले बढेको थियो।

समाचार अनुसार एप्पलको यो प्रचार कार्यक्रम पुराना आईफोन मोडेलहरूमा २०० देखि ३०० युआनसम्मको छुट, साथै म्याकबुक ल्यापटप र आइप्याड ट्याब्लेटहरूजस्ता अन्य उत्पादनहरूमा पनि लागू हुनेछ। ग्राहकहरूले वीच्याट पे वा अलिपे जस्ता तोकिएका भुक्तानी विधिहरू प्रयोग गरेमात्र यी छुटका लागि योग्य हुनेछन्।