काठमाडौं । जिल्लाको कोहलपुरस्थित प्रस्तावित अन्तरराष्ट्रिय क्रिकेट मैदानमा खुल्ला क्लब स्तरीय ट्वान्टी-२० क्रिकेट प्रतियोगिता-२०८१ हुने भएको छ ।
युनाइटेड भिजन क्रिकेट क्लबको आयोजनामा जिल्लाको कोहलपुरमा खुल्ला क्लबस्तरीय ट्वान्टी-२० क्रिकेट प्रतियोगिता हुन लागेको हो ।
क्लबका अध्यक्ष गम्भीरजंग मल्लका अनुसार स्व.वीरेन्द्र शाही स्मृति तेस्रो संस्करणको प्रतियोगिता आयोजना हुन लागेको हो । पत्रकार सम्मेलनको आयोजना गर्दै क्लबले प्रतियोगिता फागुन १८ देखि २२ गतेसम्म सञ्चालन हुने जनाएको छ । पूर्व खेलाडीसमेत रहेका शाहीको सम्झनामा क्लबले प्रतियोगिता आयोजना गर्दै आएको छ ।
वीरेन्द्र शाही भौतिक रूपमा हाल नरहेपनि उनलाई सम्झिराख्न प्रतियोगिता आयोजना गरिएको उहाँले बताउनुभयो । स्वर्गीय शाही क्रिकेटप्रेमी र एक अब्बल अलराउन्डर खेलाडी रहेको उहाँले बताउनु भयाे । शाहीले प्रशिक्षण दिएका केही खेलाडीहरू अहिले राष्ट्रिय टिममा समेत खेलिरहेको अध्यक्ष मल्लको भनाइ थियाे ।
यस्तै, पूर्व राष्ट्रिय पुरुष क्रिकेट टोलीका कप्तान एलबी क्षेत्रीले ‘राष्ट्रका लागि खेलकुद, स्वास्थका लागि खेलकुद’ मात्र नभई राष्ट्रिय जनशक्ति उत्पादनका लागि पनि खेलकुदको महत्व रहेको बताउनुभयो । उहाँका अनुसार जनशक्ति उत्पादनसँग खेलकुदलाई जोड्नुर्छ भन्ने बुझाइमा राष्ट्रिय नीतिहरू परिवर्तन हुन आवश्यक छ । अहिले पनि कोहलपुर क्रिकेट मैदानमा धेरै पूर्वधार बन्न बाँकी रहेको उहाँले बताउनुभयो ।
जसको स्वामित्व स्थानीय सरकार र जिल्ला क्रिकेट संघले लिनुपर्ने उहाँको भनाइ छ । क्रिकेटको क्रेज बढ्दो रहेकाले यसको विकास गर्न जरुरी रहेको उहाँले बताउनुभयो । प्रतियोगितामा बिजेता क्लबलाई १ लाख ५० हजार र उत्कृष्ट खेलाडीलाई ७१ हजार पुरस्कार रहेको छ ।
देशभर रहेका जुनसुकै नेपाली क्लबहरूले सहभागिता जनाउन पाउने आयोजकले जनाएको छ ।
