काठमाडौं । दक्षिण एसियाली फुटबल फेडेरेसन (साफ)ले यस वर्ष हुने साफ च्याम्पियनसिप होम एण्ड अवे संरचनामा आयोजना गर्ने भएको छ । साफको बिहीबार नेपालमा बसेको कार्यसमिति बैठकले यस वर्ष जुन १५ देखि जुलाई २५ सम्म प्रतियोगिता आयोजना मितिसमेत निर्धारण गरेको हो ।

यस्तै, बैठकले साफका निश्चित प्रतियोगिताको मार्केटिङ अधिकार स्पोर्ट फाइभलाई प्रदान गरेको छ । ‘हामी प्रतियोगिताको होम एण्ड अवे संरचनालाई कायम राख्न सक्दो प्रयास गर्नेछौँ । तर, पछि त्यसमा केही समस्या आएमा हामी यस वर्षको प्रतियोगिता मध्यस्थ भूमिमा आयोजना गर्नेछौँ,’ साफका महासचिव अन्वरुल हकले बैठकपछि भन्नुभयो ।

बैठकले साफ प्रतियोगिताको इतिहासमा पहिलोपटक क्लब च्याम्पियनसिप आयोजना गर्ने निर्णयसमेत गरेको छ । जसअनुसार प्रतियोगिताको पहिलो संस्करणमा आठ टिमको सहभागिता हुनेछ । प्रतियोगिताका निम्ति एएफसी क्लब वरीयताको शीर्ष स्थानमा रहने राष्ट्रबाट दुई क्लबले सहभागिता जनाउन पाउनेछन् । यस्तै, बैठकले महिला क्लब प्रतियोगिता-२०२५ र साफ यू-२३ प्रतियोगिता २०२६ मा आयोजना गर्ने निर्णय गरेको छ ।