काठमाडौं । भारतीय अन्तरिक्ष अनुसन्धान संगठन (इसरो)ले सफलतापूर्वक आफ्नो स्पाडेक्स उपग्रहहरू एसडिएक्स ०१ (चेजर) र एसडिएक्स ०२ (लक्ष्य) अन्तरिक्षमा डक गरेको छ । स्पेस डकिङ भनेको अन्तरिक्षमा दुईवटा अन्तरिक्ष यान जोड्नु हो ।
डकिङ प्रक्रिया हालका हप्ताहरूमा कम्तीमा दुईपटक ढिलाइ भएको र अन्ततः बिहीबारका लागि निर्धारित गरिएको थियो । अन्तरिक्ष एजेन्सीका अनुसार डकिङपछि दुईवटा उपग्रहलाई एउटै वस्तुका रूपमा नियन्त्रण गर्न सफल भएको र आगामी दिनमा अनलकिङ र पावर ट्रान्सफरबारे अनुसन्धान गरिनेछ ।
प्रधानमन्त्री नरेन्द्र मोदीले सामाजिक सञ्जाल ट्विटरमा एक पोस्टमार्फत् देशका वैज्ञानिकहरूलाई उपलब्धि हासिल गरेकोमा बधाई दिँदै भन्नुभएको छ, ‘आगामी वर्षहरूमा भारतको महत्वकांक्षी अन्तरिक्ष अभियानका लागि यो महत्वपूर्ण कदम हो ।’ रुस, अमेरिका र चीनपछि स्पेस डकिङ हासिल गर्ने भारत चौथो देश बनेको छ । (सिन्हृवा)
