काठमाडौं । जय मिडिया मेनेजमेन्टको आयोजनामा बालबालिका लक्षित शो ‘नेपाल किड्स आइडल’ हुनेभएको छ । आयोजकका अनुसार यो शोमा ५ देखि १५ वर्ष उमेर समूहका बालबालिकाले सहभागिता जनाउन पाउनेछन् ।

जय मिडियाका संस्थापक जयराज रायले नेपालका सबै जिल्ला र भारतका सिक्किम, दार्जिलिङ, आसाम, देहरादुनलगायत स्थानमा अडिशन गरी उत्कृष्ट बाल प्रतिभाको खोजी गर्ने बताउनुभयो । ‘हामी फागुनबाट अडिसन सुरु गर्छौ । माघको अन्तिम साताबाट अडिशन गर्ने पूर्वयोजना भए पनि प्रतिकुल मौसमका कारण फागुनमा गर्न लागेका हौं’, उहाँले भन्नुभयो ।

शोमा विजेतामध्ये पहिलोले १० लाख, दोस्रोले पाँच लाख, तेस्रोले तीन लाख र चौथोले दुई लाख रुपैयाँ नगद पुरस्कारसहित विभिन्न उपहार पाउनेछन् । संस्थापक जय राजले शोको निर्णायक चाँडै सार्वजनिक गरिने बताउनुभयो । उहाँका अनुसार २८ एपिसोड रहने शो नेपालको एक राष्ट्रिय टेलिभिजनबाट प्रसारण हुनेछ ।