काठमाडौ । ई-प्लानेट नेसनल हाईस्कुल टी-१० क्रिकेट च्याम्पियनसिप-२०८१ को सुदूरपश्चिम छनोटको उपाधि वेस्टर्न क्रिस्टल एकेडेमीले जितेको छ । धनगढीस्थित मोहना खेल मैदानमा शुक्रबार सम्पन्न फाइनलमा वेस्टर्न क्रिस्टलले विद्याभूषण पब्लिक स्कुललाई ३३ रनले पराजित गर्दै नेसनल हाईस्कुल च्याम्पियनसिपका लागि छनोट भएको हो । सुदूरपश्चिम छनोटबाट विजेताका रूपमा वेस्टर्न क्रिस्टलले अब राष्ट्रिय फाइनलमा प्रतिस्पर्धा गर्नेछ । राष्ट्रिय फाइनल माघ २३ देखि २६ गतेसम्म काठमाडौंमा आयोजना हुनेछ, जहाँ सात प्रदेशका विजेता टिम र आयोजक टिम गरी आठ टिमले उपाधिका लागि प्रतिस्पर्धा गर्नेछन् ।

फाइनल खेलमा १०४ रनको लक्ष्य पछ्याएको विद्याभूषणले निर्धारित १० ओभर ब्याटिङ गरे तापनि ४ विकेट क्षतिमा ७० रनमात्र बनाउन सक्यो । विद्याभूषणका लागि नवीन शाहले सर्वाधिक २० रन बनाउनुभयो जुन क्रममा उहाँले १७ बलमा ३ चौका प्रहार गर्नुभयो । प्रशान्त मदाईले १६ तथा रोशन विक र विवेक दुवालले समान ११ रन बनाउनुभयो ।

वेस्टर्न क्रिस्टलका बलर रोशन रावल, युनिक मल्ल र बिक्की सिंहले १/१ विकेट लिनुभयो । यसअघि टस जितेर ब्याटिङ गरेको वेस्टर्न क्रिस्टल एकेडेमीले निर्धारित १० ओभरमा ४ विकेट क्षतिमा १०३ रन बनाएको थियो । वेस्टर्न क्रिस्टलका लागि ओपनर आरेश बोहराले सर्वाधिक ३७ रन बनाउनुभयो जुन क्रममा उहाँले २३ बलमा ४ चौका र १ छक्का प्रहार गर्नुभयो । यस्तै, चौथो नम्बरमा ब्याटिङ गर्नुभएका दीपक कुडमालले मात्र १३ बलमा २ चौका र ३ छक्का मद्दतले ३३ रन बनाउनुभयो । शंकर बोहराले ११ रन बनाउनुभयो । विद्याभूषणका रोशन विकले २ तथा विवेक दुवाल र नवीन शाहले १/१ विकेट लिनुभयो ।

प्रतियोगिताको उत्कृष्ट खेलाडी शंकर बोहरा घोषित हुनुभयो । बोहराले सेमिफाइनलमा ब्राइट वे पब्लिक स्कुलविरुद्ध शतक बनाउनुभएको थियो ।