काठमाडौं । आहा रारा पोखरा गोल्डकपमा थ्रीस्टार सेमिफाइनलमा प्रवेश गरेको छ । पोखरा रंगशालामा आइतबार भएको खेलमा टाइब्रेकरमा चार-दुई गोल अन्तरले हराउँदै थ्रीस्टार अन्तिम चारमा प्रवेश गरेको हो । अब थ्रीस्टारले थण्डरबोल्ट नर्थ युनाइटेड र ब्ल्याक बुल्स एसपीबीच हुने अन्तिम क्वाटरफाइनलको विजेतासँग खेल्नेछ ।

आइतबार निर्धारित समयमा खेल गोलरहित बराबरीमा टुंगिएपछि अतिरिक्त समयमा धकेलिएको थियो । अतिरिक्त समयमा पनि गोल नभएपछि पेनाल्टी सुटआउटमा पुगेको थियो । जसमा थ्रीस्टारले बाजी मार्‍यो ।

थ्रीस्टारका दीपेश घले, फोडे फफाना, विराज महर्जन, लक्ष्मण रुचाल र मच्छिन्द्रका दिवाकर चौधरी र सनिश श्रेष्ठले गोल गर्नुभएको थियो । विशाल घलानको प्रहार बारमा लागेर फर्कियो भने आदित्य शाक्यको प्रहार थ्रीस्टारका सरिन जिसीले रोक्नुभएको थियो ।

मच्छिन्द्र प्रिक्वाटरफाइनलमा विभागीय टोली एपिएफ एफसीलाई हराउँदै क्वाटरफाइनल पुगेको हो भने थ्रीस्टारले बाई पाएर सिधै क्वाटरफाइनल खेलेको हो । थ्रीस्टार पाँचपटकको आहा रारा गोल्डकपको च्याम्पियन टोलीसमेत हो । मच्छिन्द्रले भने अहिलेसम्म पोखरामा उपाधि जित्न सकेको छैन । यसपटक पनि क्वाटरफाइनलबाटै बाहिरिएको छ ।

पोखरामा २४औँ संस्करणको आहा रारा गोल्डकप जारी छ । शनिबार भएको पहिलो क्वाटरफाइनलमा नेपाल पुलिस क्लब ब्रिगेड ब्वाइज क्लब युकेलाई हराउँदै सेमिफाइनलमा पुगेको छ । आगामी फागुन ३ गतेसम्म चल्ने प्रतियोगिताको विजेताले १२ लाख एक हजार र उपविजेता टोलीले ६ लाख एक हजार रुपैयाँ पुरस्कार पाउनेछन् ।