काठमाडौं । नेपाली महिला राष्ट्रिय क्रिकेट टोलीले मार्च ७ देखि १६ तारिखसम्म युगाण्डासँग क्रिकेट सिरिज खेल्ने भएको छ । सिरिजका लागि नेपाल क्रिकेट संघ (क्यान) ले इन्दु बर्माको कप्तानीमा १४ सदस्यीय खेलाडी टोलीको घोषणा गरेको छ । क्यानले दुई साता बन्द प्रशिक्षणमा रहेका १८ खेलाडीबाट अन्तिम टोलीको नाम सार्वजनिक गरेको हो ।

टोलीमा साना प्रविन र रिया शर्माले पहिलोपटक स्थान बनाउनुभएको छ । प्रशिक्षणमा रहनुभएका सिमाना केसी, सबनम राई, शोभा रोकाय र मनिषा उपाध्याय बाहिरिनुभएको छ । टी-२० सिरिजमा आयोजक युगाण्डासहित नेपाल, हङकङ र नामिबियाको सहभागिता रहनेछ । सहभागी टोलीले एक आपसमा दुईपटक प्रतिस्पर्धा गरेपछि शीर्ष दुई टोलीबीच उपाधिका लागि भिडन्त हुनेछ ।

नेपालले आफ्नो पहिलो खेल मार्च ८ तारिख नामिबियासँग खेल्दै सिरिजको सुरुवात गर्नेछ । नेपालले दोस्रो खेल मार्च ९ मा युगाण्डा र तेस्रो खेल मार्च १० मा हङकङसँग खेल्नेछ । यस्तै, नेपालले पुनः मार्च १२ मा नामिबिया, १३ मा युगाण्डा र १४ मा हङकङको सामना गर्नेछ ।

युगाण्डा जाने खेलाडी टोलीमा कप्तान बर्मासहित रुविना क्षेत्री, बिन्दु रावल, पूजा महतो, सम्झना खड्का, ममता चौधरी, राजमती ऐरी, रोमा थापा, रचनाकुमारी चौधरी, कविता जोशी, ईश्वरी विष्ट, अलिशाकुमारी यादव, साना प्रविन र रिया शर्मा हुनुहुन्छ ।