काठमाडौं । विराटनगरको सहिद रंगशालामा जारी ‘विराट गोल्डकप’ फुटबल प्रतियोगिता अन्तर्गतका शुक्रबार भएको तेस्रो क्वाटरफाइनल खेलमा थ्रीस्टार क्लब विजयी भएको छ ।

प्रतियोगितामा थ्रीस्टार क्लबले गत वर्षको विजेता मच्छिन्द्र क्लबलाई २–१ गोलले पराजित गरेको हाे । प्रतियोगिताको तेस्रो क्वाटरफाइनल खेलमा थ्रीस्टारका खेलाडी आशिष चापागाईंले १५ मिनेटमा र दिपेश घलेले २४ मिनेटमा गोल गरेका थिए । मच्छिन्द्रका खेलाडी देवेन्द्र तामाङले मध्यान्तरपछि ८९ मिनेटमा गोल गरे ।

जितसँगै थ्रीस्टार क्लब सेमिफाइनलमा प्रवेश गरेको छ । यस खेलको ‘म्यान अफ दी म्याच’ भएका थ्रीस्टारका दिपेश घलेले ११ हजार पुरस्कार प्राप्त गरेका छन् ।

शनिबार चौथो क्वाटरफाइनल खेल चर्चब्वाइज युनाइटेड क्लब काठमाडौं र एनआरटी काठमाडौंबीच साँझ ६ः३० बजे हुने आयोजकले जनाएको छ । प्रतियोगितामा भारतका दुई र नेपालका विभागीय टिमसहित १० वटा समूह सहभागी छन् ।

प्रतियोगिताको विजेतालाई ११ लाख, उपविजेतालाई पाँच लाख, उत्कृष्ट प्रशिक्षक, उत्कृष्ट गोलरक्षक र सर्वाधिक गोलकर्तालाई जनही १५ हजार, दैनिक हुने खेलको उत्कृष्ट खेलाडीलाई ११ हजार र सर्वोत्कृष्ट खेलाडीलाई ५१ हजार नगद पुरस्कार दिइने आयोजकले जनाएको छ ।