काठमाडौं । म्यानचेस्टर सिटीका फरवार्ड एर्लिङ हालान्ड लामो समय मैदानबाहिर रहनुहुने भएको छ । सोमबार गरिएको स्क्यानपछि सिटीले हालान्डको चोटको पूर्ण मूल्यांकन गर्न विशेषज्ञसँग परामर्श लिने जनाएको छ । सिटीले हालान्डको पुनरागमनको निश्चित समयसीमा तोकेको छैन । तर, सिजन सकिनुअघि फिट हुने अपेक्षा गरिएको छ । ‘चोटको थप मूल्यांकन भइरहेको छ,’ सिटीले आफ्नो वेबसाइटमा उल्लेख गरेको छ, ‘हालान्ड सिजनका बाँकी खेलहरूमा सहभागिता जनाउन फिट हुने अपेक्षा गरिएको छ, जसमा यस समरको फिफा क्लब विश्वकप पनि समावेश छ ।’
एफए कप क्वाटरफाइनलमा बोर्नमाउथविरुद्ध खेल्दा उहाँको बायाँ खुट्टामा चोट लागेको थियो । आइतबार बोर्नमाउथविरुद्ध आफ्नो सिजनको ३०औँ गोल गरेकै क्षण मिडफिल्डर लुइस कुकको ट्याकलमा परेर उहाँ घाइते हुनुभएको थियो ।
सिटी यस सिजन च्याम्पियन्स लिगका लागि छनोट हुन संघर्षरत छ । लिगमा पाँचौं स्थानमा रहँदा शीर्ष चारभित्र पर्न नौ खेल बाँकी छन् । साथै एफए कपको सेमिफाइनल अप्रिल २६ मा वेम्ब्लीमा नटिङ्घम फरेस्टविरुद्ध खेल्नुपर्नेछ । (एजेन्सी)
