काठमाडौं । पञ्जाव किङ्सका प्रियान्स आर्याले इण्डियन प्रिमियर लिग (आइपिएल) मेगा अक्सनबाट पाएको रकमले आफ्ना माता-पितालाई घर उपहार दिनुहुने भएको छ । युवा स्टार प्रियान्सलाई पञ्जावले तीन करोड ८० लाख भारुमा खरिद गरेको थियो । २४ सालका प्रियान्सले मार्च २५ मा अहमवादमा गुजरात टाइटन्सविरुद्ध डेब्यु गर्नुभएको थियो । ओपनिङ ब्याटरले पहिलो खेलमै २३ बलमा ४७ रन बनाउनुभएको थियो ।
हाल प्रियान्सका परिवार दिल्लीस्थित सरकारी भवनमा बस्दै आएका छन् । हालसम्म उनीहरूको घर छैन । प्रियान्सको परिवारमा ६ जना शिक्षक जागिरे छन् । उहाँका बुबा पवन कुमार र आमा राजवाला दिल्लीमै पढाउनुहुन्छ । उहाँकी जेठी दिदीसमेत एमए बिएड हुनुहुन्छ । सन् २०२३ को अक्सनमा भने प्रियान्सलाई कुनै पनि टिमले खरिद गरेको थिएन । कुनै टिमले खरिद नगरेपछि प्रियान्स पुनः तयारीमा जुट्नुभएको थियो ।
डेब्यु खेलमा चार विकेट लिने पहिलो भारतीय बलरमा अश्विनी
जारी इण्डियन प्रिमियर लिग (आइपिएल)को डेब्यु खेलमा मुम्बई इण्डियन्सका अश्विनी कुमारले चार विकेट लिनुभएको छ । उहाँको उत्कृष्ट बलिङमा तेस्रो खेलमा मुम्बईले पहिलो जित दर्ता गरेको छ । सोमबार राती कोलकाता नाइट राइडर्सविरूद्धको खेलमा मुम्बई इण्डियन्सका देब्रेहाते तीव्र गतिका बलर अश्विनी कुमारले तीन ओभरमा मात्र २४ रन खर्चिएर चार विकेट लिनुभएको हो । उहाँ आइपिएलको डेब्यु खेलमा चार विकेट लिने पहिलो भारतीय बलर बन्नुभएको छ ।
सोमबारको खेलमा डेब्यु गर्नुभएका उहाँले आइपिएलको आफ्नो पहिलो बलमै कोलकाताका कप्तान अजिन्का राहाणेको विकेट लिनुभएको थियो । उहाँले कोलकाताका कप्तान रहाणेसँगै रिंकु सिंह, मनिष पाण्डे र आन्द्रे रसेलको विकेट लिनुभएको थियो । तीन ओभरमात्र बलिङ गर्नुभएका उहाँले पाण्डे र रसेललाई बोल्ड आउट गर्नुभएको थियो । उहाँलाई मुम्बईले अक्सनमा ४० लाखमा आबद्ध गराएको छ ।
माहालीमा जन्मिनुभएएका उहाँ पछिल्लो समय घरेलु क्रिकेटमा उत्कृष्ट बलिङ गरेर चर्चामा रहनुभएको थियो । अश्विनीको उत्कृष्ट बलिङमा मुम्बईले कोलकातालाई १६.२ ओभरमा ११६ रन बनाउँदा अलआउट गरेको थियो । अश्विनीले ऐतिहासिक बनाएको सोमबार भएको तेस्रो खेलमा कोलकाता नाइट राइडर्सलाई ४३ बल बाँकी हुँदा मुम्बईले आठ विकेटले हराउँदै पहिलो जित निकालेको हो । कोलकाताले दिएको ११७ रनको लक्ष्य मुम्बईले १२.५ ओभरमा दुई विकेटको क्षतिमा पूरा गरेको थियो । (एजेन्सी)
