काठमाडौं । नेपालमा पहिलोपल्ट कुकिवन कप तेक्वान्दो च्याम्पियनसिप आयोजना हुने भएको छ । नेपाल तेक्वान्दो संघ र विश्व तेक्वान्दो मुख्यालय कुकिवनको संयुक्त आयोजनामा प्रतियोगिता सातदोबाटोस्थित तेक्वान्दो एकेडेमी हलमा वैशाख ४ देखि ६ गतेसम्म हुन लागेको हो ।

प्रतियोगितामा ब्रेकिङतर्फ साइड किक, फिस्ट, नाइफ, हाइजम्प र अलराउण्ड गरी पाँच विधा समावेश छ । जसमा २८ स्वर्ण पदका लागि प्रतिस्पर्धा हुनेछ । ब्रेकिङमा युनियरतर्फ यू-१२, १३-१५, १६-१८ तथा सिनियरतर्फ १९-२९ र ३०-५९ गरी पाँच उमेर समूहमा २८ स्वर्णका लागि प्रतिस्पर्धा हुने आयोजकले मंगलबार पत्रकार सम्मेलनमार्फत जानकारी दिएको छ ।

यस्तै, अथोराइज पुम्सेतर्फ पाँच उमेर समूहका एकल, पियर र ग्रुप पुम्से गरी तीन विधामा ३० स्वर्णका लागि प्रतिस्पर्धा गराइनेछ । यसैगरी तेक्वान्दो एरोबिकमा महिला र पुरुष गरी पाँचदेखि सातजनाको टिम बनाई सिनियर र जुनियर तथा टिम ग्यागोरीमा महिला तथा पुरुष यू-१२, १८ र २९ गरी तीन समूहमा ६ स्वर्णका प्रतिस्पर्धा गराइनेछ ।

अनुमानित बजेट २१ लाख १५ हजार रुपैयाँ रहेको प्रतियोगितामा मेडल विश्व तेक्वान्दो मुख्यालय कुकिवनले उपलब्ध गराउनेछ भने बाँकी रकम नेपाल तेक्वान्दो संघले नै व्यस्थापन गर्नेछ ।