काठमाडौं । प्रत्येक वर्ष भोजपुर सदरमुकाममा सञ्चालन हुँदै आइरहेको खुला मेयर कप महिला फुटबल प्रतियोगिताअन्तर्गतको सातौं संस्करणको खेल आज(बुधबार)बाट सुरु हुँदैछ । सो प्रतियोगितामा ६ वटा महिला टिमको सहभागिता रहनेछ ।

भोजपुर जिल्ला फुटबल संघको आयोजना तथा भोजपुर नगरपालिकाको मुख्य प्रायोजनमा आजबाट सुरु हुने प्रतियोगिता चैत २३ गतेसम्म चल्ने संघका अध्यक्ष प्रवीण सुवालले जानकारी दिनुभयो ।

भोजपुर नगरपालिका-७, कोदारमा रहेको रंगशालामा सञ्चालन हुने फुटबल प्रतियोगितामा धनकुटा नगरपालिका, भोजपुर नगरपालिका वडा नम्बर १०, भैंसिपंखा, खाँदबारी नगरपालिका, कनकाई, झापा, टेम्केमैयुङ गाउँपालिका र मोर्डन इरा विराटनगरले सहभागिता जनाउने फुटबल संघका अध्यक्ष सुवालले बताउनुभयो । प्रतियोगिता सञ्चालनका लागि खेल तालिकासमेत सार्वजनिक भइसकेको छ ।

प्रतियोगितामा विजेता हुने टिमले नगद एक लाख पाँच हजार ५५५ रुपैयाँ र उपविजेता टिमले नगद ५१ हजार ५५५ पाउनेछन् भने व्यक्तिगत विधातर्फ पनि पुरस्कारको व्यवस्था गरिएको आयोजकले जनाएको छ ।

गत वर्षको छैटौं संस्करणमा पनि ६ टिमले सहभागिता जनाएका थिए । जसमा सप्तरीको नमोबुद्ध युथ क्लब विजेता भएको थियो भने इलामको ओएसिस क्लब उपविजेता बनेको थियो ।