काठमाडौं । ओपनएआईले डिसेम्बरमा आफ्नो ओ३ रिजनिङ एआई मोडेल सार्वजनिक गर्दा कम्पनीले एआरसी-एजीआई नामक परीक्षण मापदण्डका सिर्जनाकर्ताहरूसँग साझेदारी गरेको थियो। यस परीक्षणले उच्च क्षमतायुक्त एआईको मूल्यांकन गर्छ। केही महिनापछि, प्रारम्भिक परिणामहरू भन्दा कम प्रभावशाली देखिने गरी संशोधित गरिएको छ।

गत हप्ता, एआरसी-एजीआई परीक्षणको प्रशासन गर्ने आर्क प्राइज फाउण्डेशनले ओ३ मोडेलको अनुमानित कम्प्युटिङ खर्च अद्यावधिक गरेको छ।

सुरुमा, संस्थाले ओ३ को उच्चतम प्रदर्शन गर्ने संस्करण, ओ३ हाइले एउटा एआरसी-एजीआई एआरसी-एजीआई समस्या समाधान गर्न करिब ३ हजार डलर खर्च हुने अनुमान गरेको थियो। अब संस्थाले यो लागत झण्डै ३० हजार डलर हुनसक्ने बताएको टेकक्रञ्चले उल्लेख गरेको छ।

विशेष गरी सुरुवाती चरणमा हालको अत्याधुनिक एआई मोडेलहरू के कति महँगो हुनसक्छन् भन्ने झल्काउने हुनाले यो संशोधन उल्लेखनीय रहेको बताइएको छ। ओपनएआईले अहिलेसम्म ओ३ को मूल्य निर्धारण गरेको छैन, न त सार्वजनिक रूपमा उपलब्ध गराएको छ।

तर आर्क प्राइज फाउण्डेशनले ओपनएआईको ओ१-प्रो मोडेलको मूल्यलाई उपयुक्त तुलनात्मक आधार मान्न सकिने बताएको छ। ओ१-प्रो हालसम्म ओपनएआईको सबैभन्दा महँगो मोडेल हो।

“हामी विश्वास गर्छौं कि ओ१-प्रो, वास्तविक ओ३ को लागत तुलना गर्न नजिकको उदाहरण हो … किनभने यसको परीक्षण समयको कम्प्युटिङ प्रयोग धेरै छ,” आर्क प्राइज फाउण्डेशनका सहसंस्थापक माइक नूपले बताएका छन्। “तर यो अझै पनि एक अनुमान मात्र हो, त्यसैले आधिकारिक मूल्य निर्धारण नभएसम्म ओ३ लाई हामीले हाम्रो लिडरबोर्डमा प्रिभ्युको रूपमा राखेका छौं।”

ओ३ हाइको लागत उच्च हुनु अनौठो हुनेछैन, किनभने यो मोडेलले ठूलो मात्रामा कम्प्युटिङ स्रोत प्रयोग गर्ने बताइएको छ। आर्क प्राइज फाउण्डेशनका अनुसार, ओ३ हाइले एआरसी-एजीआई समाधान गर्न ओ३ लो को तुलनामा १७२ गुणा बढी कम्प्युटिङ प्रयोग गरेको थियो।

त्यसैगरी, ओपनएआईले व्यवसायिक ग्राहकहरूका लागि महँगो सदस्यता योजनाहरू ल्याउने योजना बनाइरहेको भन्ने चर्चा लामो समयदेखि चलिरहेको छ। मार्चको सुरुमा द इन्फर्मेशनले ओपनएआईले विशेष एआई “एजेन्टहरू” का लागि मासिक २० हजार डलरसम्म शुल्क लिनसक्ने रिपोर्ट गरेको थियो।

ओपनएआईका महँगो मोडेलहरू पनि पेशेवर मानव कर्मचारीको तुलनामा कम लागतमा आउन सक्ने केही विश्लेषकहरूको तर्क छ। तर, एआई अनुसन्धानकर्ता टोबी अर्डले एक्समा उल्लेख गरेअनुसार, यी मोडेलहरू यति प्रभावकारी नहुन सक्छन्। उदाहरणका लागि, एआरसी-एजीआई परीक्षणमा ओ३ हाइले आफ्नो उत्कृष्ट स्कोर प्राप्त गर्न प्रत्येक कार्यमा १,०२४ पटक प्रयास गर्नु परेको थियो।