काठमाडौं । छैटौं एसपिए सुदूरपश्चिम स्पोर्ट्स अवार्ड २०८१ मा खोखोका हेमराज पनेरु र मानमती धामी वर्ष खेलाडी घोषित हुनुभएको छ । खेलकुद पत्रकार मञ्च कैलालीको आयोजना, सुदूरपश्चिमाञ्चल एकेडेमी एसपिएको मुख्य प्रायोजन तथा सुदूरपश्चिम प्रदेश खेलकुद परिषद्को मुख्य प्रवद्र्धनमा भएको अवार्डमा पनेरु वर्ष खेलाडी पुरुष र धामी वर्ष खेलाडी महिला घोषित हुनुभएको हो ।
पनेरु प्रथम खोखो विश्वकपको महिलातर्फ नेपाललाई उपविजेता बनाउने कप्तान हुनुहुन्छ । पनेरुसँगै कराँतेका मोहमद शेखु आलम र भलिबलका अर्जुन नेपाली मनोनयनमा पर्नुभएको थियो । धामी प्रथम खोखो विश्वकपको महिलातर्फ नेपाललाई उपविजेता बनाउने खेलाडी हुनुहुन्छ । उहाँसँगै बक्सिङकी स्वस्तिका तिरुवा र कबड्डीकी मानमती विष्ट मनोनयनमा पर्नुभएको थियो । अवार्ड विजेता पनेरु र धामीले नगद ३५–३५ हजार रूपैयाँसँगै ट्रफी प्राप्त गर्नुभयो ।
यस्तै, कबड्डीका हरिना थापा वर्ष प्रशिक्षक हुनुभयो । उक्त विधाको मनोनयनमा कबड्डीकै विष्णु भट्ट र भलिबलका जगदीश भट्ट पनि पर्नुभएको थियो । थापा नेपाललाई एसियन महिला कबड्डी च्याम्पियनसिपमा पहिलो पटक कांस्य पदक जिताउने प्रशिक्षक हुनुहुन्छ । विजेता थापाले नगद ३० हजार रूपैयाँसँगै ट्रफी प्राप्त गर्नुभयो ।
वर्ष युवा खेलाडी भने कबड्डीका सुशील चुनारा हुनुभयो । बंगलादेशमा भएको चौथो बंगबन्धु पुरुष अन्तर्राष्ट्रिय कबड्डी प्रतियोगितामा नेपाली टोली उपविजेता बन्दा उहाँले उत्कृष्ट प्रदर्शन गर्नुभएको थियो । चुनाराले नगद २५ हजारसहित ट्रफी प्राप्त गर्नुभयो । उहाँसँगै वर्ष युवा खेलाडीको मनोनयनमा फुटबलका निराजन धामी र क्रिकेटका नरेन साउद पनि पर्नुभएको छ । यस्तै, पुरुषतर्फ पौडीका अथर्व सिंह र महिलातर्फ कराँतेका मनिषा बोहरा सुदूरपश्चिम आइकन घोषित हुनुभयो । सिंह वल्र्ड एक्वेटिक्स च्याम्पियनसिपको छनोट प्रतियोगितामा नयाँ राष्ट्रिय कीर्तिमान कायम गर्ने खेलाडी हुनुहुन्छ भने बोहरा भुटानको थिम्पुमा भएको आठौँ दक्षिण एसियाली कराँते प्रतियोगितामा नेपाललाई स्वर्ण पदक जिताउने खेलाडी हुनुहुन्छ । दुवै विजेता खेलाडीले नगद २५-२५ हजारसहित ट्रफी प्राप्त गर्नुभयो । पुरुषतर्फ सिंहसँगै क्रिकेटका हेमन्त धामी र कबड्डीका खगेन्द्र जोशी तथा महिलातर्फ कबड्डीका मनिषा जोशी र क्रिकेटकी सावित्री धामी मनोनयनमा पर्नुभएको थियो ।
यस्तै, फुटबलका कमल लामालाई लाइफटाइम एचिभमेन्ट र क्रिकेटकी रितु कनौजियालाई स्पेशल अवार्ड प्रदान गरिएको आयोजक खेलकुद पत्रकार मञ्च कैलालीले जनाएको छ । लामा सुदूरपश्चिममा फुटबल खेलका सुरुवातकर्ता हुनुहुन्छ भने कनौजिया नेपाली महिला क्रिकेट टोलीकी पहिलो ब्याच हुनुहुन्छ । उहाँ अहिले पनि क्रिकेट खेलाडीकै रूपमा सक्रिय हुनुहुन्छ । उहाँहरू दुवैजनालाई नगद २५–२५ हजारसहित ट्रफी प्रदान गरिएको थियो ।
छैटौं संस्करणको अवार्ड कार्यक्रम मंगलबार धनगढीमा भएको हो । सुदूरपश्चिमका सामाजिक विकासमन्त्री मेघराज खड्काको प्रमुख आतिथ्यता र आयोजक खेलकुद पत्रकार मञ्च कैलालीका अध्यक्ष प्रदीप पाठकको अध्यक्षतामा कार्यक्रम भएको थियो । कार्यक्रममा गायक दुर्गेश थापालगायतका कलाकारको प्रस्तुति पनि रहेको थियो ।
