काठमाडौं । शेरबहादुर खड्का स्मृति प्रतिष्ठानको आयोजनामा आठौं केएनपी नेरोल्याक राष्ट्रिय महिला भलिबल प्रतियोगिता आगामी वर्ष वैशाख दोस्रो साता हुने भएको छ । आयोजकले आइतबार पत्रकार सम्मेलन गर्दै प्रतियोगिता वैशाख १० देखि १३ गतेसम्म हुने जानकारी दिएको हो । महिला भलिबल खेलाडीको सशक्तीकरण र क्षमता अभिवृद्धि गर्ने उद्देश्यले प्रतिष्ठानले २०७२ सालदेखि हरेक वर्ष राष्ट्रिय महिला भलिबल प्रतियोगिता आयोजना गर्दै आएको छ ।

आयोजकका अनुसार प्रतियोगितामा साबिक एपिएफ क्लब, न्यु डायमन्ड युथ स्पोट्र्स क्लब, नेपाल पुलिस क्लब, त्रिभुवन आमी क्लब, जावलाखेल भलिबल प्रशिक्षण केन्द्र र एभरेष्ट भलिबल क्लब गरी ६ टोलीको सहभागिता रहनेछ ।

विगतमा चार टिम सहभागी भएकोमा यसपटक ६ टिम पुर्‍याइएको प्रतिष्ठानका अध्यक्ष रञ्जन खड्काले जानकारी दिनुभयो । चार टिमको सहभागिता पक्का भइसकेको र एभरेष्ट भलिबल क्लबको सहभागिता पनि हुने विषयमा छलफल भएको खड्काले बताउनुभयो । बाहिरबाट आउने टिमलाई खान बस्न सुविधा पनि दिने उहाँले बताउनुभयो ।

नेपाल भलिबल संघको प्राविधिक सहयोगमा सञ्चालन हुने प्रतियोगितामा सहभागी टोलीलाई दुई समूहमा विभाजन गरी लिगकम नकआउटका आधारमा खेल सञ्चालन गरिनेछ । प्रतियोगिताका विजेता टोलीले नगद चार लाख ९९ हजार रुपैयाँ पुरस्कार प्राप्त गर्नेछ । यस्तै, उपविजेतालाई दुई लाख ५० हजार र तेस्रो हुने टोलीलाई एक लाख २५ हजार रुपैयाँ नगद पुरस्कार प्रदान गरिने आयोजकले जनाएको छ ।

प्रतियोगिताका सर्वोत्कृष्ट खेलाडीलाई ५० हजार नगद पुरस्कार प्रदान गरिनेछ । विधागततर्फ उत्कृष्ट सेटर, डिफेन्स, सर्भर, लिवेरो, स्पाइकर र प्रशिक्षकलाई जनही २५ हजार र हरेक खेलको प्लेयर अफ दी म्याचलाई १५ हजार रुपैयाँ नगद पुरस्कार प्रदान गरिने बताइएको छ । प्रतियोगिता त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ ।