काठमाडौं । अर्जेन्टिनी स्टार लियोनल मेसीले इन्टर मियामीमा बलियो प्रभाव जमाउनुभएको छ । मेसीले यस सिजन खेलेका सबै चारवटै एमएलएस खेलमा गोल र असिस्ट गरेर टोलीमा आफ्नो प्रभाव जमाउनुभएको हो । सोमबार टोरन्टो एफसीविरुद्धको खेलमा पनि उहाँले गोल गर्नुभयो ।
यो सिजनको मेजर लिग सकर (एमएलएस) मा उहाँको यो चार खेलमा तेस्रो गोल हो । मेसीको गोलको मद्दतले इन्टर मियामीले १-१ को बराबरी खेल्न सफल भयो । योसँगै मेसीले मियामीका लागि ४०औँ गोल पूरा गर्नुभयो । जसले क्लबको कीर्तिमान अझै अगाडि बढाएको छ । पहिलो हाफको इन्जुरी समयमा उहाँले १८ यार्ड बक्सको छेउबाट बायाँ खुट्टाले भलि हानेर उत्कृष्ट शैलीमा गोल गर्नुभएको थियो ।
बराबरीसँगै मियामीले पूर्वी क्षेत्रमा चार जित, दुई बराबरीसहित १३ अंक पुर्याएको छ । तर, मियामी कोलम्बसभन्दा एक अंकले पछि परेको छ । मियामीले अझै एक खेल कम खेलेको छ । टोरन्टोका फेडेरिको बर्नार्डेस्कीले खेलको स्कोर खोल्नुभएको थियो । जुन गोलपछि केवल तीन मिनेटमै मेसीले मियामीलाई खेलमा फर्काउनुभयो । यो सिजन टोरन्टोले दोस्रोपटक मात्रै अग्रता लिएको हो । पहिलोपटक गत महिना शिकागोविरुद्ध १९ मिनेटका लागि अग्रता लिएको थियो । मियामीले समग्रमा आठ जित, एक हार र दुई बराबरी खेलेको छ ।
यो तथ्यांकमा कन्काकाफ च्याम्पियन्स कपका चार जित पनि समावेश छन् । मियामीको एकमात्र हार गत साता एलएएफसीसँग १-० ले भएको थियो । मियामीले च्याम्पियन्स कपको दोस्रो लेग बुधबार फोर्ट लडरडेलमा खेल्नेछ भने अर्को एमएलएस खेल आइतबार शिकागो फायरविरुद्ध हुनेछ । (एजेन्सी)
