काठमाडौं । अमेरिकाको न्युयोर्कस्थित च्याम्पियन मार्सल आर्ट्स क्लबले कराँतेका मोहम्मद शेखु आलमलाई नगदसहित सम्मान गरेको छ । डिस्ट्रिक्ट ३० का एसेम्ब्ली मेम्बर स्टेभन रागाले शेखुलाई एक हजार अमेरिकी डलर र प्रशंसापत्र प्रदान गरी सम्मान गरेको क्लबका अध्यक्ष सुनिल लामाले जनाउनुभएको छ ।
शेखु युएसए ओपन कराँते प्रतियोगिता खेल्न हाल अमेरिकामा हुनुहुन्छ । लस भेगसमा अप्रिल १८ देखि २० तारिखसम्म हुने प्रतियोगितामा शेखुले पुरुष ८४ केजीमुनि तौलसमूहमा नेपालको चुनौती प्रस्तुत गर्नुहुनेछ । करियरको १४ अन्तर्राष्ट्रिय प्रतियोगितामा शेखुले पाँच स्वर्ण, तीन रजत र दुई कांस्य पदक जित्नुभएको छ । त्यति नै घरेलु प्रतियोगितामा शेखुले नौ स्वर्ण, एक रजत र चार कांस्य हात पार्नुभएको छ ।
कार्यक्रममा नेपाली कम्युनिटीका लिडर नवराज केसी, कराँते प्रशिक्षक मकेन्द्रबहादुर सिंह र जनकसिंह खड्का, तेक्वान्दो प्रशिक्षक पुष्प थापा मगरलगायतको उपस्थिति रहेको थियो । ११औँ दक्षिण एसियाली खेलकुद (साग) तथा १३औँ एपिएसकेएफका स्वर्ण विजेता क्लबका अध्यक्ष लामाका अनुसार च्याम्पियन मार्सल आटर््स क्लब युएसएले आफ्नो नियमित प्रशिक्षणसँगै विभिन्न प्रतियोगितामा सहभागिता जनाउँदै आएको छ । त्यस्तै, क्लबले सामाजिक कार्य र खेल क्षेत्रका साथै विभिन्न व्यक्तित्वलाई सम्मान पनि गर्दै आइरहेको छ ।(हिमालय टाईम्स)
