काठमाडौं । राष्ट्रिय क्रिकेट टिमका प्रशिक्षक स्टुअर्ट ल शुक्रबार नेपाल आइपुग्ने हुनुभएको छ । नेपाल क्रिकेट संघ (क्यान)का अनुसार उहाँ अप्रिल २५ तारिखमा नेपाल आउने कार्यतालिका छ । गत चैत १५ गते प्रमुख प्रशिक्षकका रूपमा नियुक्त हुनुभएका उहाँ करिब एक महिनापश्चात् नेपाल आउन लाग्नुभएको हो । उहाँको नियुक्तिपश्चात् नेपालले ज्ञानेन्द्र मल्लको प्रशिक्षणमा हङकङ सिरिज खेलेको थियो । जसमा नेपाल उपविजेता हुँदै फर्किएको छ ।
५६ वर्षीय स्टुअर्ट ल २०११ मा श्रीलंका, बंगलादेश, वेष्ट इण्डिज, अफगानिस्तान, बंगालदेशको यू-१९ टिम तथा अमेरिकाको प्रमुख प्रशिक्षकका रूपमा काम गरिसकेको अनुभव बटुलेका प्रशिक्षक हुनुहुन्छ । उहाँ अष्टे«लियाका पूर्वखेलाडी हुनुहुन्छ ।
यसअघि क्यानले नेपालको प्रशिक्षकमा भारतीय मूलका मोन्टी देशाईलाई नियुक्त गरेको थियो । २०७९ माघमा नियुक्त हुनुभएका देशाईको सम्झौता २०८१ माघमा सकिएको थियो । उहाँको प्रशिक्षणमा नेपालले एसिया कप र १० वर्षपश्चात् टी-२० विश्वकप खेलेको थियो । उहाँले नेपालको टिममा रहेर दुई वर्ष काम गरिसकेपश्चात् क्यानले नयाँ प्रशिक्षकका रूपमा ललाई नियुक्त गरेको हो ।
५२ खेलाडीलाई चार टोलीमा विभाजन गरेर अभ्यास खेल
स्टुअर्टले आफू आएको भोलिपल्टैबाट अभ्यास खेलहरू सञ्चालन गर्दै हुनुुहुन्छ । अभ्यास खेलहरू शनिबारदेखि हुँदैछन् । मूलपानीका दुईवटा मैदानमा बन्द प्रशिक्षणका दौरान खेलहरू हुनेछन् । जसमा ६ दिनमा १२ वटा खेलहरू हुनेछन् । दुवै मैदानमा दिनको एक खेल हुनेछ ।
जसमा ५२ खेलाडीलाई १३-१३ खेलाडी सम्मिलित चार टोली बनाइएको छ । यसअघि घोषणा गरिएको ४८ जनाको टोलीमा यू-१९ टोलीका कप्तान नरेन भट्टसहित युवराज खत्री र सन्तोष यादव थपिनुभएको छ ।
यस्तै, कमलसिंह ऐरी पनि टोलीमा थपिएनुभएको छ । चार टोलीमा टिम ब्लुको कप्तान रोहितकुमार पौडेल, टिम ग्रिनको कप्तानमा आसिफ शेख, टिम रेडको कप्तानमा सन्दीप लामिछाने र टिम एल्लोको कप्तानमा दीपेन्द्रसिंह ऐरी रहनुभएको छ । यो सिरिजपछि नेपालले जुन पहिलो साता स्कटल्याण्डमा हुने आइसिसी विश्वकप लिग-२ को सिरिज खेल्दैछ । सिरिजमा नेपाल र स्कटल्याण्डसहित नेदरल्याण्ड्सबीच प्रतिस्पर्धा हुनेछ ।
